Charter Document - 02520290

Ich Rapolt der Luch tvn chvnt allen den di disen brief ansehent daz ich durich got vnd durich vnser frawn willen vnd auch durich der guttet willen di mir daz haus datz Raitenhaslah hatt getant han gegeben dem selben goteshaus mit salmans hant meinen aigen datz Rot daz ist ainen hof vnd ain mvl vnd ein lehen daz haizzet datz Neidekke vnd swaz dar zv gehort vnd swaz ich oder min vater da heten oder ie gewunnen versvht vnd [vn]versvht holtz akker wazzer wismat vischwaid hofstet vmbe drizzich pfunt Regenspurger pfenning vnd driv pfvnt der selben mvnzze ze leitchauffe miner hausfrawen vnd meinen zwain swestern Chvnigunt vnd Jevten vnd der selben kinden Andre vnde Engelram Vnd sol mir daz selbe gotshaus geben alle jar mir zv mein ains leib hvntz an minen tot fvmf vnd viertzich metzzen chorns vnd als vil habern gvtes traides vnd ain halbez pfvnt Regenspurgaer pfenning vor sand Martins tag vnd svlen auch mir das vorgenant gvt geantwurten an min mv fridlich vnd sicherlich swo ich hin wil iner zwain rasten von Raitenhaslah Vnd habent mir auch gegeben ain wis div haizzet Harderinne in dem selben geding afer nah minem tod sol daz vorgenant gut gar vnd gentzlich vnd ledichlich vnd div vorgenant vis beleiben dem selben gotshaus ewichlich fri vor meiner hausfrawen vnd aller min frivnt ansprach Daz auch disiv red stet beleih an chranchait gib ich dem gotshaus hintz Raitenhaslah disen brief verinsigelt mit mein selbes insigel an dem jar da von vnsers herren geburt waren tausent jar zwain hvndert jar vnd zwai vnd nivntzich jar Des sint getzivch hern Chvnrat der pfarrer von Perchirchen vnd her Chvnr[at] ab dem haus Ortlib der scherig Libhart von alten Mvldorf Wernhart Jordan der Chrapf Hainr[ich] Sesel Vlreich von Halerprukke Hainr[ich] von Laufen hern Perihtoldes svn Chvnr[at] ir probst von Gerihing vnd Rvdolf vnser wirt von Mvldorf vnd ander erberiger lavt vil