Charter Document - 02520289

Wir Ott von gotes gnaden phalntzgraf von Rein vnd hertzog ze Baiern tvn chvnt allen den di disen brief ansehent vnd horent lesen daz Rapot der Lvkche den hof datz Rot vnd da selben ein mvl vnd ein ander lehen mit akcher mit holtz mit wismat mit wazzer mit vischwaid vnd mit allem dem daz da zv gehoret gesvht vnd [vn]versvht hat gegeben mit salmans hant freilich vnd gantzlich vnser frowen sand Marie vnd dem goteshvse datz Raitenhaslach vor vns vnd vnser edeler lewt kagen Vnd daz disev rede stet beleihe mit allen ir Sachen nah peder tail pet abbt Chvnrates vnd sines goteshvsetz von Raitenhaslach vnd Rapot des Lvkchens vnd sines salmans geben disen brief versigelt mit vnserm grozzen insigel wir hertzog Ott Dirre sache sint gezivch Vlreich von Abensperch Albreht von Hals Pernger von Lewnberch Ortlib von Walde Hainrich von Tavfchirchen vnd Walther sein svn Perchtolt von Gebelspach Lvdweich der Grans Friderich der Schrampamer Seifrid vnd Chvnrat vnser Schreiber vnd ander vil erberig zivch Diser brief ist gegeben datz Pvrchavsen do von vnsers herren gebvrt ist gewesen tavsent jar zwai hvndert jar newntzich jar vnd ain jar des freitages vor sand Gallen tag