Charter Document - 02520286

Ich Alhait von Ror tvn chvnt allen den di disen brief ansehent daz abbt Chvnrat vnd daz gotshaus vnd div ersam samnvng von Raitenhashach habent gechauft von minen svnen Otten vnd Hainreichen ir gvt datz Altzperch swi daz genant ist akker holtz wismat waid wazzer versvht vnd vnversvht allez daz si da heten oder ir vater oder si ie da gewunnen an drizzich pfenning Regenspurger di sulen si alle jar geben von ainen lehen daz in dem selben gvt ist auf des heiligen geistes alter datz Purchausen Nu ist daz selbe gvt datz Altsperch als iz vorgenant ist vnd allez daz zv gehort oder ie dar zv gehort mein morigengab gewesen von minem seligen wirt herrn Hainreich von Ror also daz ich iz solt haben piz an meinen tot Nu han ich daz selbe gvt gar vnd gentzlichen dem gotshaus vnd der samnvng von Raitenhaslach gegeben also daz ich mir nihtes niht da behalten han swaz mein wirt oder miniv chint oder ir vodern oder ich ie da gewunnen vnd han mich sein gar vnd gentzelichen verzigen vnd sulen si mir geben sehs pfvnt Otinger pfenning di in dem gericht gib vnd geb sint alle jar an sand Martins tag piz an minen tod afer nach meinen tod want daz gvt nicht langer mein ist nivr di weil ich leb so ist daz gotshavs ledich vor aller ansprach vnd sol daz vorgenant gvt des gotshaus von Raitenh[aslach] ledichlichen vnd ewichlichen beleiben Gebent si mir afer div vorgenanten sehs pfvnt niht an sand Martins tach als vor gesprochen ist so sol ich si manen vmb di pfenning daz man mir di geb in aht tagen tvnt si des niht so sol der prior vnd der vnderprior vnd der chelner vnd der vnderchelner vnd der burser niht messe sprechen noch wein trinchen noch vische ezzen piz daz di pfenning gentzlichen gegeben werden Ich sol auch der selben morigengab ir gewer sein vntz an minen tod ob si iman ansprichet vmb daz vorgenant gvt Daz disiv red stet beleih gib ich in disen brief verinsigelt mit minem insigel mit den getzivgen di pi der sach waren vnd auch hie geschrieben Stent Daz ist her Wernhart der oberguster von Raitenh[aslach] vnd der subprior brvder Hainr[eich] daselben brvder Bozan der oberchelner brvder Hainr[eicb] der chastner brvder Purch[art] von Regenspvrch her Sighart der pfarrer vnd her Hainr[eich] der pfaerrer von Mering Ermreich Wernhart Anich Friderich Anich Zeibot Zinkke Hainr[eich] Zinkke Perichtolt der Sahse Hainr[eich] der richter Otto Hvter Hainr[eich] der Hirz Wernher der Schrimpf Vlr[eich] des abbtes chneht vnd anderrer eriberiger lavt genvnch Diser brief ist gegeben da von vnsers herren gebvrt waren tausent jar zwain hvndert jar vnd nevntzich jar an sand Cecilien tag