Charter Document - 02520285

Charter Document - 02520285


Charter Number: 02520285
Cartulary Title: Die Urkunden des Klosters Raitenhaslach : 1034-1350
Charter Language: German
Charter Origin: Religious
Charter Type(s): Confirmation
Date: 1290
Date type: Internal, Feast
Resource Link(s): Monasterium.net

Charter:

Wir Hainreich von gotes genaden der abbt von Sewen tun chunt allen den die disen brief ansehent das in vnser chloster chomen der erwirig abbt von Raitenhaslach von einem tail vnd Pernhart vnd sein bruder Ghunrad von Pfaffing von dem andern tail vnd chriegten mit einander vmb das gut datz Walthalming den selben chrieg liessen paidew tail an vns vnd an Herrn Hainr[eich] von Rosenhaim vnd an Hainr[eich] von Chiemperch vnd an Fridreichen von Chrispelsteten Nu haben wir geschaiden also das Pernhart vnd sein bruder Chunrad von Pfaffing das vorgenant gut datz Walthalming dem gotzhaws datz Raitenhaslach habent aufgeben gantzleich vnd freileich fur aigen vnd habent es widerstanden von dem gotzhaws also das si vnd ir erben dem gotzhaws sulle alle jar ewichleichen geben sechtzigt pfennig der munsse die in der grafschaft gib vnd gab sind an sand Michelstag tunt si des nicht so sullen si frist haben vntz an Merteins tag gebent sie denne des nicht weder tail von den zwain pruderen oder sein erben ir zins nicht gebent an dem vorgenanten tag die sullen verlorn haben alle die gnad vnd ir recht das in darauf verliehen ist vnd das das vorgenant gut datz Walthalming sol denne gantzleichen vnd freileichen wider uallen an das gotzhaws datz Raitenhaslach Das dise rede also stat sei geben wir in disen brief nach paider tail pet versigelt mit unserm insigel Des sind zeugen her Perichtold vnser prior her Fridreich der guster her Chunrad der verweser von Obing Hartweich unser Schreiber Fridreich von Chiemperch vnd sein sun Fridreich Hainr[eich] Preisfues Ott vnser chnecht vnd ander erber lawt Diser brief ist geben datz Sewn an sand Dionisii tag do von vnsers herren gepurt waren tawsent jar zwain hundert jar vnd newntzigt jar