Charter Document - 02520284

Ich Bernhart von Pfeffing vergich offenbar vnd tvn chunt allen den di disn brief sehent oder horent lesen daz ein chriech was zwischen mir vnd dem ersam apt von Raitenhaslach vmb daz gvt datz Walthalming do wart dersel chriech enschied lazzen vnd wart geschaiden daz ich mich verzech aller ding des selbn gvts vnd bestvnd ez her wider mit beschaidner red mir vnd meinen erben also daz ich oder nah mir mein erben alle jar solt gebn hintz Raitenhaslach vierzich pfenning an sand Michels tach tet ich dez niht so schold ich frist habn auf sand Marteins tach geb ich si denn niht so schol daz selb gvt datz Walthalming ledichleichn vnd vreilichn gevallen an allen chriech an daz gotshaus ze Raitenhaslach des geschach daz ich den selbn eins versaz da fvern di brvdere von Raitenhaslach auf dev lantreht vnd behabtn daz dikch genant gvt ze Walthalming Dar nach han ich Bernhart mit den pesten vnd den wegsten datz Wazzerburch erlangt nach grozzer vleg vnd pet daz mir der vorgenant apt von Raitenhaslach vnd sein samnung habnt wider geantwurt daz gvt datz Walthalming daz ich ez in dem reht schol habn ich vnd mein erbn als ich ez vor han gehabt daz ich noch oder mein erben alle jar sullen gebn vierzich pfenning an sand Michels tag Swo wir daz verzikten ich oder mein erbn so hab wir dannoch vrist vntz an sand Marteins tag Versezz wir dann ich oder meinev chint den eins daz wir in niht gebn so solt des nehsten tags ledich sein dem gotshaus ze Raitenhaslach daz oft genant gvt ze Walthalming vnd sol ez wider ledichleichn angevallen an alle widerred fver vreiz vnd ledigz aign noch enmag ich noch meinev chint fvrbaz dehain reht dar auf habn oder jenen Ja halt daz allez daz daz obn geschribn ist von mir vnd meinen erben werd behalten so setz ich mit gvtem willen meiner erben LX pfenning gelts meins vrein aigns datz Stokchaim zu ainem fvrpfant also swo ich ez vberge oder dehain mein erb daz daz selb gvt datz Stokchaim vreiz aigen sol sein an selgerets stat des gotshaus ze Raitenhaslach vnd han auch ez auf geselt in vnser []