Charter Document - 02520283

Wir bruder Chunrad der abbt von Raitenhaslach tun chunt vnd alle vnser samung allen den die disen brief ansehent das vns schuf Leutold der schucz sein ansidel datz Walthalming durich seiner sei willen vnd jach das stund fumf phunt vnd ein halbes Pernhart vnd Chunrad den brudern von Pfaffing do jahen dieselben bruder ir vater hiet gechauft von Leutold das vorgenant gut fur aigen der sach haben wir lang gechriegt wider ein ander Nw zu dem lesten sampten wir vns paidenthalben in dem chloster datz Sewn vnd Hessen den selben chrieg an vnsern Herren herrn Hainreich den erbergen abbt von Sewen vnd an herrn Hainreichen von Rosenhaim vnd an Hainreich von Chiemperch vnd an Fridreich von Chrispelsteten Nu habent si geschaiden also das Pernhart vnd sein bruder Chunrad von Pfaffing das vorgenant gut datz Walthalming vns vnd vnserm gotzhaws habent aufgegeben ganczleich vnd freileich fur aigen vnd habent es wider bestanden von vns vnd von vnserm gotzhaws datz Raitenhaslach also das si vnd ir erben vnserm gotzhaws sullen alle jar ewichleichein geben sechtzigt pfennig der munsse die in der grafschaft gib vnd gab sind an sand Michelstag tunt si des nicht so sullen si frist haben vntz an sand Merteins tag gebent si denne der nicht weder tail von den zwain bruder oder sein erben ir zins nicht gebent an dem vorgenanten tag die sullen verloren haben alle die gnad vnd ir recht das in darauf verliehen ist vnd das vorgenant gut datz Walthalming sol denne gantzleichen vnd freileichen wider vallen an vns vnd an vnser gotzhaws datz Raitenhaslach Das disew red also stat beleih geben wir in disen brief versigelt mit vnserm insigel Diser sache sind zeugen vnser herre abbt Hainreich von Sewen vnd vnser subprior vnd vnser oberchelnar pruder Potzan pruder Wernhart vnser oberguster pruder Fridreich pruder Hainreich pruder Hiltprant pruder Ott von Ausse vnd her Perichtold der prior von Sewn her Fridreich der guster her Chunrad der verwesar von Obing Hartweich der Schreiber daselben Fridreich von Chiemperch vnd sein sun Fridreich Hainr[eich] Preisfuez Otte des abts chnecht vnd erwarig lawt Diser brief ist geben datz Raitenhaslach an sand Dionisen tag do von vnsers herren gepurt waren tawsent jar zwain hundert vnd newntzich jar