Charter Document - 02520281

Ich Hainreich von Ror tvn chunt allen den di disen brief ansehent daz mein bruder Otte dem got genad vnd ich haben gegeben dem gotzhaus hintz Raitenhaslah durich vnser sei willen vnd vmb sehtzich pfvnt Otinger pfenning vnser gvt datz Altsperch also daz wir niht auzgenonamen haben noh vns behalten swaz vnser vater vnd vnser mvter da gehabt habent vnd auch wir selbe noch akker noch holtz noch wismat noch wazzer noch Waid noch iht daz wir da haben oder ie da gewunnen gesvht oder vnversvht an drizzich pfenning Regenspurger di gehornt zv des heiligen geistes alter datz Burchausen Nv ward vns der pfenning daz ist der sehtzich pfvnt ettlich tail gegeben di weil mein brvder Otte lebt daz ist zwainzich pfvnt vnd sibenev vnd nach meines brvder tod hat vns abbt Chvnrat vnd daz gotshaus datz Raitenhaslah gewert gar vnd gentzlichen der sehtzich pfvnt Nv han ich minen hof datz Emichaim geantwurt daem gotshaus datz Raitenh[aslah] ze ainem fvrpfant fvr di drizzich pfvnt div meinen bruder vnd sinev chint angevallen sint vntz daz si vergehen daz si der drizzich pfvnt Otinger gewert sein vnd lob getrevlich daz ich des vorgenanten gvtes datz Altsperch gewer sei des gotshaus datz Raitenh[aslah] als ze Bairen in dem lande reht ist Des sint getzivch Syghart der pfarrer Virich der Chalp Friderich der Haller Otte der Hvter Friderich der Anich Ermreich Seibot de Zink Hainr[eich] der Chopler Hainreich der Stamhaimer Ghvnrat der Loter Albreht des Rorers probst Fridereich der Lvf auch sein chneht Vlreich vnd Chvn des abbtes chnehte vnd ander vil erweriger lavt Dirre brief ist gegeben da von vnsers herren tod woren tausent jar zwai hvndert jar vnd nevntzich jar an vnser frowen tach als si geboren ward Daz afer disev red vnd ditze geding stet beleih geben wir dem gotshaus von Raitenh[aslah] disen brief verinsigelt mit vnserm insigel