Charter Document - 02520277

Wir Fridreich Vlreih Hainr[eich] vnd Chunr[at] von Hallerprvk vergehen vnd tun chunt allen den die disen prief lesent oder horent lesen daz wir den hof datz Prinhausen vnd die gut datz Chruzenpuehel vnd ze Vorod vnd zwai datz Laidreting vnd siben zehenthaus vmb Schrenchenbach haben verchauft dem ersam apt Chunr[at] von Raitenhaslach vnd siner sammung vmb sehs vnd sibentz pfunt pfenning Salzburger munsse mit guten willen aller vnser chint wan besunderlichen ygleichs sinen leitchauf hat enpfangen vmb die Verzeihung vnd ze dem ersten dev meinen Fridreihs chint Chunrat Vlr[eih] Friedreih Ludweich vnd auh mein Vlreihs chint Chunrat Vlreih Gebhart Wernher Diemut vnd Chungund vnd auh div meinen Chunratz Vlreih vnd Chungunt vnd haben dev vorgenanten gut mit allem dem daz da zue gehort besuechtz vnd vnbesuechtz swie ez genant ist fur vreiz vnd ledigs aigen geben dem gotzhaus ze Raitenhaslach also daz wir noh vnserev chint nimmer mer dhainen chriech noh dhain ansprach darnah suln noh mugen haben noh gewinnen Vnd daze der chauf vnzebrochen vnd stet behalten wert dem oft genantem gotzhaus ze Raitenhaslach haben wir Fridreich vnd Vlreich vnserev aigenev insigel gelegt an dise hantvest ze einem waren vrchund Vnd wan wir Hainreih vnd Chunrat niht enheten aignev insigel hat her Chunrat von Teching vnd her Niclay von Ambrang durih vnser vlig vnd pet irev insigel gehangen an disen brief ze einer ewigen bestetigung aller der sache die oben gescriben sint Distz chaufez sint gezeug her Chunrat von Teching her Nicolay von Amprang Chun von Auperch Fridreih der Chrispelsteter Fridreih der Darm Hainr[eich] von Pimzwanch Ditmar der Hegler Vlreih von Auw Hainreih der Puhs Ortel dez aptz kneht Ortlieb dez chelners chneht vnd H der Gwikker ist auh gezeug vnd her Frid[reich] der pfarrer von Grabenstat vnd Vlreich Puch den gast vnd ander erberigen zeug genuch Wir veriehen auh all vier bruder von Hallerprvk daz wir die oben gescriben gut haben auf geselt ze Raitenhaslach auf vnser fraun alter ze gesihtt vnd zee dere gegenwrtichait aller der sammung vnd dez gesintz ze Raitenh[aslach] die all samt diser sache gezevg sint Disev hantvest ist gegeben datz Raitenhaslach do von vnsers herren geburt waren tausent jar zwai hundert jar vnd in dem nevn vnd ohzig jar dar nah dez suntags nah sant Philips vnd sand Jacobs tach