Charter Document - 02520276

Ich Gotschalch von Vnczing der ettwenn vitztum was ze Salzburch vnd Elspet mein hausvrowe wir tvn chunt allen den di disen brief ansehent daz wir durch got vnd durch vnserr sei hail vnd vnserr vodern selicheit vnser vreiz aign daz sint zwen hof datz Weng di mein vater der Hainr[eich] der vitztvm von Salzburch von dem gotshaus ze Admvnd hievor gechauft hat mit vreir gab gegebn habn vnser vrowen des ersten vnd darnach vnserm herren apt Chunr[ad] vnd gemainleich der samnung ze Raitenhaslach mit solher beschaidenhait daz di weil wir paidev lebn aller der dienst chlain vnd groz der von den hofen chvmt alle jar vns halber vnd in vnd dev samnung halber schol angehoren an daz fleisch ain daz sol vns svnderlichen angehoren di weil wir lebn Von disem selgeret sol man an sand Vitals tag der in dem mayn ist einen dienst der samnung gebn Wan des tages sullen si begen aller meiner vodern jartach vnd auch vnser paider jarzeit swann wir sterben Swaz aber vber daz dienst vber wirt an dem gelt daz schol man nach des priors vnd des subpriors rat der samnung anlegn daz in di pfrvnt davon alle tag gebezzert werd von dem aduent vnsers herren vntz an den heiligen weinaht tach Als aber wir baidev tat geligen ich Gotschalch vnd ich Elspet so schvllen di baid hof mit allem ir nvtze der dazv gehoret versvecht vnd vnuersvechet vnuerschaidenlichen gehorn hintz Raitenh[aslach] daz halber nvtz dem apt vnd halber nvtz der samnung zv ir tische vnd zv ir nvtz gehor mit der beschaidenhait vnd davor gesprochen ist daz man an sand Vitals tag vnserr vodern vnd aller den der wir sein schvldich sein vnd auch vnser baider jartach ewichleichn da bege vnd auch daz si des tags vnd auch von dem aduent vntz hintz weinahten nach des priors vnd subpriors rat pezzerung an ir pfrunt habn Daz daz ewichleich stet sei vnd vnzefvert beleih so gebn wir disn brief versigelt mit dism insigel Der brief ist geschriben von vnsers herren bvrdlichem tag an dem tausentisten jar vnd zwai hundert jar vnd nevn vnd atzech jar