Charter Document - 02520275

Wir bruder Chunrat der abt von Raitenhaslach tun chunt allen den di disen brief hornt vnt sehent daz wir ein chrieg vmb ein hub datz Pessemos zwieschen vnser bruder Heinreichs vnt Otten einhalben vnt Chunrats von Pernungshaim vnser swester tahter wirtes anderthalben der bedenthalben an vns gelassen wart also beschaiden haben daz vnser vargenant bruder H[einreich] vnt Ot[te] di hub halbev an allen chrieg ledichleichen haben schuln vnt dez andern tails Chunrats von Pernungshaim vnt seiner hausfrawen Diemuten vnser vargenant swester tahter schuln behalter sein vntzen an ir beider toet Is daz Ch[unrat] von Pernungshaim bi vnser swester tahter chint gewinnet di lehen gehaben megen di schuln di hub mit samt in haben Gewinnet aver er tohter der behalter schuln sein vnser offtvargenant bruder H[einreich] vnt Ot[te] oder ir beider chint nach ir toet Is daz daz er weder svn noch tohter bi ir gewinnet so schal er doch di hvb halbev haben an allev widerrede vntzen an sinen toet Dev beschiedung ist geschehen do von Christes burt warn tauzent vnt zwai hundert vnt nevn vnt ahtzch jar vnt geb dez vrchunt disen brief mit vnserm insigel mit disen zevgen bruder Berhtolt der chelner von Raitenh[aslach] bruder Hilprant der subprior bruder Heinrich der huter Vlreich Ch[unrat] Friderich drei bruder von Halleprukk Perhtold vnt H[einrich] vnser beider bruder svn Ch[unrat] vnt H[einrich] von Sassawe