Charter Document - 02520268

Ich Alber der vitzvm von Pharrchirchen tvn chvnt allen den di disen brief ansehent daz mines herren levte frowe Mehthilt vnd ir zwen svn Chvnr[ad] vnd Hainr[eich] etleichen chriech heten genomen vmb erbreht avf dem hof datz Waltenperg daz chlagt der erberig abbt Chvnr[ad] vnd di samnvnge datz Raitenhaslach mine herren dem edeln hertzogen H[ainreich] von Baiern als verre daz der chriech von peiden tailen wart an mich lazzen mit gvtem willen Davon han ich geschaiden also daz der erberig abbt Chvnr[ad] vnd di samnvng dvrch minen willen vnd dvrch ir beschaidenhait den vorgenanten levten den hof datz Waltenperg gelihen habent ze pawemans reht von der liehtmisse di nv gewesen ist vber zwai jar also daz si dem goteshvs von Raitenhaslach dinen svln di zwai jar von dem hof daz drit tail vnd allen dienst vnd stewer di darzv gehorent an alle Widerrede vnd als di vorgenanten zwai jar ein ende habent so sol vrowe Mehthilt vnd ir zwen svn Chvnr[ad] vnd Hainr[eich] nimermer chain chriech noh dehain ansprach gewinnen noh chain fvrzoch haben noh gewinnen avf dem hof datz Waltenperg svnder der erberig abbt sol in bestiften mit swem er wil als von reht sines goteshvs lediges aigen Daz dise sache also stet sei geben wir dem abbt von Raitenhaslach vnd der samnvnge disen brief versigelten mit vnserm insigel Der brief ist gegeben an dem svntag ze mitter vasten des jares do von vnsers gewrt waren tavsent jar zwai hvndert jar vnd eht vnd ahtzich jar Des sint gezivch brvder Berch[told] der chelner brvder Pozan her Ch[vnrad] der pharrer von Perchirchen her Ortwein vnser Schreiber her Hainr[eich] von Eisenpvch Wilham der Sahse von Gern Wernhart der rihter datz Oting Frid[reich] der castner da selben Chvnr[ad] Plonschilt Albreht der Tetelhaimer Pilgreim der Galer Otte vnd Wernhart von Havsen Gerolt von Oting F[ridreich] der Chrispelsteter maister Wernher Ditmar der Helgler Jordan ir probst Chvn vnd Vlreich des abbtes chnete von Raitenhaslach vnd ander erberiger levt vil