Charter Document - 02520267

Wir Otte vnd Hainrich [die brvder] von Ror tvn chvnt allen den die disen brief ansehent daz vns abbt Chvnrat vnd div sammvng von Raitenhaslah gelihen habent durich [] vnsers hauses nevn mutte vnd zehen metzen rokken vnd aht mvtte habern vnd zwainzich pfvnt vnd zwai Otinger pfenning die solt wir in stvn [] nv habent si vns frist gegeben der selben svlt vncz vnser frawn tvlt der liehtmesse div nv schirst chomt dvrich vnser lieb Div selbe [] lieb haben wir angesehen vnd haben in gegeben vur aigen abbt Chvnraden vnd dem gotshavs datz Raitenhaslah vnser gvt datz Altsperig also [daz wir] niht auz nemen swaz vnser vater vnd vnser mvter da gehabt habent vnd auch wir selbe noch akcher noch holtz noch wismat noch wazzer noch iht daz w[ir] da haben oder ie gewinnen gesvht oder unversuht an drizzich pfenning Rengenspurger gelts die gehornt zv des heiligen geistes alter datz Pvrchvsen mit der beschaidenhait vnd mit dem reht ob wir Otte vnd Hainrich die brvder von Ror oder vnser eriben vor vnser frawn tvlt der liehtmesse div schirst chomt dem gotshaus datz Raitenhaslah wider geben daz vor genant gvt daz ist zwainzich pfvnt vnd zwai vnd nevn mvtte vnd zehen metzen rokken vnd aht mvtte habern Otinger maz so sol daz vorgenant gvt datz Altsperig ledichlichen wider an vns gevallen als e Geben aver wir daz vorgenant gvt niht vor vnser frawn tult der liehtmesse div schirst chomt gar vnd gantzlichen so sol vns daz gotshaus geben oder vnsern eriben sehtzich pfvnt [] di danne gib vnd gseb sint nah der selben vnser frawn tult in vierzehen tagen Wir svln aver in absiahen daz vorgenant gvt pfenning [] sein niht geben als vorgenant ist an den sehtzich pfvnden Darvber geben wir dem gotshaus disen brief versigelten mit vnserm insigel Di[rre brief ist geb]en an sand Agathe tag des jares da von vnsers herren gebvrt waren tausent jar zwai hvndert jar vnd aeht vnd ahtzich jar Des sie[nt getzivge her Vlrich] von Seivridesdorf her Meingoz von Apheltal Walther von Hornbach Vlr[ich] der Chalp Ch[vnrad] der richter von Purchavsen Ortlib der Anich Otte []er Seibot vnd Hainrich die Zinkken Albreht der probst Fr[idrich] der Chrispelsteter Chvno vnd Vlr[ich] des abbtes diener vnd ander