Charter Document - 02520265

Wir Otto vnd Hainreich die pruder von Ror tun chunt allen den di disen brief ansehent daz vnser hertzen libev mvter vnd frowe Alhait hat gegeben dem goteshaus hintz Raitenhaslah durich ir sei hail vnd durich unsers vater sei zehen phvnt Regenspuger phenning nah ir tod mit vnserm gutem willen auf dem hof vnd auf der hub datz Altsperig vnd auf allem dem daz vnser libev muter vnd wir da haben versuht vnd vnversuht Darvber haben wir ich Otto vnd min prvder Hainr[eich] von Ror genomen durich vnser durft von abt Chunrat vnd der sammvng datz Raitenhaslah zwai vas weins vmb aht phvnt Otinger phenning vnd vir mutte rokken Otinger vnd zehen metzen vnd vir mutte habern auch Otinger mazzes vnd ainen maidem vmb sehs phunt Otinger vmb ditz vor genantez gut daz vnser muter durich ir sei vnd durich vnsers vater sei dem gotshavs datz Raitenh[aslah] hat gegeben vnd daz auch wir von dem gotshaus genomen haben als oben genant ist so haben wir abbt Ch[unrat] vnd dem goteshaus datz Raitenhaslah fvr aigen gegeben daz vor genant gut datz Altsperig also daz wir niht auznemen noh acher noh holtz noh wis noh wazzer noh nihtes daz wir da haben oder ie da gewunnen an dreizich phenning geltes die gehorent ze selgeret zu des heiligen gaistes alter datz Purchusen mit der beschaidenhait vnd mit dem gedingen ob wir Otto vnd Hainr[eich] die prvder von Ror vor vnser frowen tvlt ze der lihtmisse di schirst chomt vnd von danne vber ain jar dem goteshaus datz Raitenhaslah widergeben daz gut daz wir von im genomen haben so sol daz gut datz Altsperig allez ledichlichen wider an vns gevallen alsame Vber dise sach alle hat abt Ch[unrat] vnd die sammvng von Raitenh[aslah] gesatzet an vnser beschaidenhait vnser mvter frowen Alhaiden vnd an mich Otten von Ror swaz wir si haizzen geben vmb daz gvt minner oder mer di selben schiedvng svln auch wir tvn vor vnser frowen tvlt ze der lihtmisse di schirst chomt Stiribt aber vnser ainz in der frist des got nihten geb so sol iz der schaiden der da lebent ist Vnd ze ainem vrchvnd vnd zerstetigvn dirre sahe geb wir abt Ch[vnrat] vnd der sammvng disen brief versigelten mit vnserm insigel Dirre brief ist geben an der ainliftausent magd tag des jares do von vnsers herren purt waren tausent jar vnd zwaihundert jar vnd siben vnd ahtzig jar Vber dise rede alle so setzen vnd saphen vnd schaiden wir Otte von Ror vnd mein hertzen libiv muter frowe Alhait mit des abbt Ch[unrat] vnd der sammung datz Raitenh[aslah] ob ich Otte vnd mein mvter pediv sterben vor liehtmisse div schirist chomt daz danne herr Vlrich von Seifridesdorf schidman sei an vnser stat auf sein triwe vnd auf sein gewizzen Dirre sache sint getzivge Meingoz von Vberecher Vl[rich] Chalp Ch[unrat] dev richter Lvd[wig] der Swentener Al[brecht] der propst Frid[rich] der Haller Ortib vnd Fr[idrich] di Anichen Herinrich Seibot Zink Ch[unrat] Forstel Ot der huter vnd ander erberiger leut genunch