Charter Document - 02520262

Ich Alharat von Frowenhoven tvn chvnt allen den di disen brief ansehent daz Wernhart der Chelnser von Werde vnd sein svn Wernhart vnd Perchtolt dvrch ir sei vnd dvrch ir vodern sei hail habent gegeben ein hof datz Aepping mit allem daz darzv gehort vnser vrowen vnd dem goteshvs datz Raitenhaslach mit sotanem geding daz Wernhart vnd sein prvder Perchtolt vnd ir peider havsfrowen Levkkart vnd Helen den hof solten haben vntz an der vier leib tot vnd scholten dem goteshvs drei Schilling phenning davon geben elliv jar vnd wart di selbe gab vnd daz selbe selgret gevestent vnd gestetigt mit minem insigel vnd mit miner hantvest Darnah gemant vnser herre got Wernharten vnd sein havsfrowen Levkkarten daz si freilichen daz reht vnd di leibgeding di si zv ir peider leib heten avf dem hof datz Aepping vnser vrowen habent gegeben hintz Raitenhaslach vnd sich des selben hoves gentzlichen vnd ebichlichen habent verzigen Aber darnah wan Perchtolt Wernhartes prvder tot was da het avf dem hof nimen dehain reht wan Helen Perchtoldes havsfrowe zv ir ainem leib div selbe Helen gab ir reht daz si zv ir ainigem leib het ir chinden di si pei Perchtolden het vnd von dem si avch daz selbe reht het Vlrechen Offmein Wendelein mit offnaer fvrziht vnd mit erberigen zivgen in des Chrahamers havs datz Werde Vber di rede alle habent di vorgenanten chint Vlreich Offmei Wendel daz selbe reht daz Helen ir mvter vnd si avf dem hof datz Aepping heten abbt Chvnraten vnd dem gotshvs datz Raitenhaslach ledichleichen ze chovffen gegeben vm zehen phvnt Regenspurger phenning vnd habent sich verzigen aller der ansprach di si avf dem hof datz Aepping gehaben mohten von dehainer slaht sache vnd habent mich gebeten daz ich disiv rede alle vnd den geberft vnd di fvrziht stetig vnd vesten mit miner hantvest Darvmme gib avch ich nv abbt Chvnr[aten] vnd dem goteshvs datz Raitenhaslach minen brief gevestent mit minem insigel ze einer ebigen steticheit Des sint gezivch brvder Otte Walch[vn] der pharrer von Tavfchirchen her Alban sein geselle her H[einreich] sein geselle Goie von Rainpoltzaim H[einreich] von Schiterperg Wern[hart] von Wisen Wernher von Reinpoltzaim Geb[hart] Weichart von Ebring H vnd H von Wentenhai Lvdwich von Wisen Jordan vnd Ger von Chvnrating vnd ander erbaer levt vil Ditz ist geschehen datz Werde vnd datz Tavfchirchen do von vnsers herren gebvrt waren MCCLXXXVII jar