Charter Document - 02520257

Ich uolrich von Wispach Offney mein haufrave Ulrich mein svn vnd alli vnser erben vergehen offenleich an disem brief allen den di in sehent oder horent lesen daz ich mit wolbidachtem mvt vnd nach meiner besten friunt rat dem goteshaus vnd der sammvnge ze Raitenhaslach han gegeben mein aigenev hveb datz Otmaringe ze rechtem selgret vnd auch fur den schaden den ich demselben goteshaus getan het in dem chriege ze Titmaninge vnd han den ersamen abbt Gebharten vnd daz obengenant gotshaus der selben hveb gesetzet in nvtz vnd gewer also daz si ewichleich bei dem goteshaus sol bileiben fur freiz aigen bisuecht vnd vnbisuecht mit allen den rechten vnd nvtzen di da zue gehorent vnd wir noch vnser erben hawen furbaz darauf chainerlay gewer nicht weder mit stift noch mit vogtey noch mit nachtseiden oder mit chainerlay recht vnd sol man alliv jar meinen jartach bigen nach des ordens gewonhait Des sind ziuge Hainr[eich] mein bruder vnd Chuen von Teysinge meiner swester svn her Hertneid von Noppinge Chunr[ad] der chamrer Hainr[eich] von Haus Seibot der trugsetze Albrecht der Zappf vnd ander getriv leut genvege Daz ist geschehen nach Christes gepvrtt vber zwelif hvndert jar vnd fumf vnd ochzich jar in dem nechsten jar darnach an sande Matheis tage