Charter Document - 02520256

Ich Vlreich von Wispach tun chund allen den die disen briff ansehent daz mir der abbt vnd die sammungt von Raytenhaslach habent gegeben zway vas weines vnd drey mutt rokken vnd haber Ottinger mazz vnd sol in auch vier phunt phenning Ich han auch dem goczhaws erleichen schaden getan an der sammung swaig rindern Dizer sach aller raittung secz ich an dez abbcz beschaidenhait vnd seiner sammung Darueber anttwuert ich dem abbt vnd seiner sammung meinen hoff dacz Ehing mit meins suenes hannt also daz sich der abbt vnd sein sammung weren der vorgenanten sach allersamt von dez hofes nucz Als sy dez guetes gewert werdent alles nach ir beschaidenhait so sol der hoff wider gevallen an meinen sun Vlr[eich] ist aber daz mein sun daz gut mag gehaben mit ein ander daz er dem goczhaws wil geben nach dez vorgenanten abbcz vnd seiner sammung raittung so sol der hoff dacz Ehing wider alz ee an meinen sun Vlr[eich] gevallen Daz aber daz alles stat sey darvber geb ich dem abbt vnd der sammung disen gegenwirtigen briff verinsigelt mit meinem insigel vnd sind czewg maister Hainrich von Haus der her Goczsalch von dem Newnhaws der her Hertneid von Haunsperg der her Chuenr[ad] von Teising vnd ander frueme lewt Diser briff ist gegeben von Christ gepurd in dem tausendstem jar zwain hundert jar vnd an dem sechs vnd ochtzistem jar