Charter Document - 02520254

Wann daz wuerchen der menschen offt komen mochtt in zebrechung ist notturftig dieselben bestaetten mit geschrift Darvmb sullen erkennen all gegenburttig sam kuenftig die den gegenburttigen brief ansehent daz wir M[argret] techantin vnd der gancz conuent der frawn der kirchenn vnser lieben frawn sancte Marie zu Nidernburch ze Bassaw von gemainem vnnserm rate vnd ainigem willen Timon genant Roten dy gullt der VII ß welich zu purckrecht in seiner hofstat vnd gruntten in dem werd bei dem turn gelegen wir gehabt haben vmb III s Ib Bassawer muenß haben wir im auf freyem marckt verkaufft vnd zu kauffen geben allso daz wir gegenburttig noch kuenftig vnser nachkomen mit nichtte kain gerechtikait furan haben sullen in der benanten hofstat Zu ainer gezeugnuß vnd sicherhait haben wir den gegenwurttigen briefe im geben pewart mit vnnserm sigill vnd mit den hernach gemercktten zeugen Das sind zeugen her Englschalich her Vlrich her Hainreich vnnser cappellaen her Leutold von Talheim Conrat von Puech Ott von Brachadicz richtter zu Bassaw Alram Prew Conrad Zeller Conrad Tafso Bernhart in der Milichgassen Hainreich der Puecherin aidem Hainreich des Hermans aidem Vlreich Porro Alber Rot Alber Zipflaer Vlreich von Steting Vlreich von Inczing Vlreich Salczmacher Irenfried der Taleinn aidem Simon Haberuellder [] vnd mer fromer lawt Datum anno domini MCCLXXXV an sant Peter vnd Pauls abent