Charter Document - 02520251

Ich Hainreich von Harschirchn vergich des allen den di disen brief ansehent daz Albreht von Vberech mit sinem sweher dem Pollinger an sand Sixten tag zv mir chom datz Ering bei Mvldorf da mein lieber herre apt Chvnrat von Raitenh[aslach] enantwurt waz vnd mir aufgab den zehent des daorfes datz Harpollen vnd zehant mich flizchlich pat daz ich mir vnd im vnd vnserr paider vodern damit macheht ein selgeret daz ich den zehent lihe dem gotshaus datz Raitenh[aslach] vnd auf selte wan ich dv vnd immer het vnd haben wil guten willen ze fvdern willichleich daz gotshaus datz Raitenh[aslach] Do verleh ich denselben zehent dem vorgenanten gotshaus ewichleichen ze behalten Fridreichen dem Chrispelsteter Dietmaren dem Hegler Vlr[eichen] dem Maier Hainrichen von Gewikke Des sint gezevge prvder Perhtolt von Lauffen der chelner prvder Pozan von Muldorf der den brief hat geschriben prvder Chunrad von Salmanswieler Hainreich sein chneht vnd ander zevch Daz geschach do von vnsers herren geburt waren tavsent jar vnd zwaihundert jar vnd ahtzich jar vnd fvmf jar Daz daz also stet sei han ich disen brief gegeben versigelten mit meinem insigel