Charter Document - 02520249

Ich Ekhart von Tann offen vnt tun chunt allen den die disen brief lesent oder horent lesen daz ich durih got vnt durih vnser frauwen willen vnt auh durih mein vnt aller meiner vorfodern selicheit han gegeben der samnung vnt dem gotzhaus ze Raitenhaslach meins rehten aigens zwai gut datz Chirichperch ze einem ewigem selgret vnt auh fur sehzechen pfunt pfenning die sold ich gelten dem ersamen apt Chuonraten von Raitenhaslach gar vnt gaentzleichen mit allem dem daz dar zu gehoeret versuecht vnt vnuersuecht swi iz genant ist Ja halt daz ditz selgret dester steter beleih dem gotshaus ze Raitenh[aslach] vnt nah meinem tod an chrieg vnt an all ansprahh han ich den vorgenanten apt vnt daz gotzhaus ze Raitenh[aslach] gesetzet in nutz vnt in gewer bei meinem lemtigem leib Vnd daz der red also sei vnt das ditz selgret beleih stet vnt vnzebrohen vnt sicher vor ansprahh aller meiner erben han ich dem gotzhaus ze Raitenh[aslach] ze einem waren vrchund gegeben disen brief versigelten mit meinem insigel Der brief ist gegeben do von vnseres herren geburt waren tausent jar zwai hundert jar in dem vier vnt azichgistem jar an sant Peters vnt sant Paules tach