Charter Document - 02520237
| Charter Number: | 02520237 |
|---|---|
| Cartulary Title: | Die Urkunden des Klosters Raitenhaslach : 1034-1350 |
| Charter Language: | Latin |
| Charter Origin: | Lay |
| Charter Type(s): | Confirmation |
| Date: | 1281 |
| Date type: | Internal, A.D., Feast |
| Resource Link(s): |
Monasterium.net |
Charter:
Antiquorum decrevit provisio nec modernorum displicet ingenio res gestas ne in futuri scandali questionem ducantur neve etiam alicuius periculi senciant detrimentum scripture testimonio perenniter roborari Hinc est quod ego Sighardus Sentlinger civis Monacensis ad noticiam universorum quorum manibus presens pagina revoluta fuerit cupio pervenire quod pie recordacionis Sighardus similiter dictus Sentlinger civis premisse civitatis Monacensis avus meus macellum situm in iamdicta civitate Monacensi in annua pensione pondus sepi quod vulgo wag vocatur vel summa denariorum quanta illa pensio valeat compensari retinens monasterio sancte Marie in Raytenhaslach ordinis Cisterciensis in remedium anime sue rite ac libere delegavit Et quia dominus abbas et fratres prefati monasterii eundem avum meum et me ac uxorem meam necnon per consequens sangwinis mei antecessores quoscumque in divinorum et elemosinarum que inibi aguntur participacionem ac sue fraternitatis consorcium receperunt liberaliter et precise presentem paginam super prefata delegacione sive ordinacione macelli suprascripti ei favens sicut debeo et quasi subscribens prelibato monasterio tradidi ut omnis via et occasio ausu temerario veniendi contra pretaxatam delegacionem quibuslibet precludatur sigilli civitatis Monacensis sepe dicte munimine roboratam Datum anno domini MCCLXXX primo in die ascensionis domini Testes Perth[oldus] iudex Monacensis Ch[unradus] Schrencho Hainricus Schrencho Ch[unradus] Witschit Ellenger Perth[oldus] Puechaimer Ulricus Ettenhauser Ekhart Nanshaimer Heinricus Giesinger Schweigerus Schrencho Egler Vlricus caupo prepositus de Moching Vlricus carpentarius Perth[oldus] Haeidrarius Eberhardus Slunto Ruger Roverius Wernher Wilbertus Eberhardus Scolaris Sentlingarii