Charter Document - 02520236
| Charter Number: | 02520236 |
|---|---|
| Cartulary Title: | Die Urkunden des Klosters Raitenhaslach : 1034-1350 |
| Charter Language: | Latin |
| Charter Origin: | Religious |
| Charter Type(s): | Confirmation |
| Date: | 1281 |
| Date type: | Internal, A.D., Feast |
| Resource Link(s): |
Monasterium.net |
Charter:
Wichardus dei gracia ecclesie Patauiensis episcopus mutariis suis in Patauia et in Obernberg constitutis necnon omnibus ad quorum noticiam tenor presentis scripti pervenerit salutem et plenitudinem omnis boni Cum a longe retroactis temporibus a reverendis patribus venerabilibus predecessoribus nostris monasterio et fratribus in Raitenhaselah Cysterciensis ordinis Salzburgensis dyoecesis sit concessum ut singulis annis de suis propriis salibus duo talenta salis maioris ligaminis una tantum vice et omnia sua victualia que habere potuerint annuatim sine qualibet exactione mute que tam in Patauia quam in Obernberg nomine ecclesie nostre et nostro recipi consuevit transducant vel tranduci faciant libere et quiete et huiusmodi gracia ex ipsorum sollempnibus litteris pateat evidenter nos qui nutu divino in ministerio pastoralis sollicitudinis ipsis successimus eorum exempla salutaria sequi quantum nobis a deo concessum fuerit cupientes dicto monasterio et fratribus de Raitenhaselah ex favore quem ad ipsorum ordinem semper habuimus et habemus duximus indulgendum et a nostris predecessoribus indultum ipsis recognoscimus ac etiam eandem graciam de certa scientia confirmamus et volumus ut de suis sicut premissum est salibus duo talenta semel in anno et omnia sua victualia sine muta et exactione qualibet transducant absolute et libere annuatim Venerabilis etiam abbas dicti monasterii ex parte fratrum et conventus nos ac fratres omnes capituli nostri Patauiensis participes constituit omnium orationum missarum et beneficiorum que deo et sanctis eius in suo monasterio in perpetuum exhibentur et quecumque in missarum celebrationibus et in defunctorum commemorationibus nostris predecessoribus promiserunt pro nobis nostrisque successoribus ac fratribus omnibus capituli nostri Patauiensis presentibus et futuris cum devocione debita perpetuo observabunt Ut vero hec nostra gracia dicto monasterio tam in confirmatione antique concessionis quam in nostra concessione facta perpetua firmitate subsistat presentes dedimus litteras nostro sigillo munitas Sunt autem hii huiusmodi facti nostri testes venerabilis in Christo pater dominus Ch[vnradus] episcopus Chyemensis magister Engescalcus et dominus Heinricus de Inna canonici Patauienses et dominus Heinricus de Radekk et alii plures Datum Wienne anno domini MCCLXXXI feria III in ebdomada pascali