Charter Document - 02520232

Ich Alhart von Frowenhoven tvn chvnt allen den di disen brief ansehent daz ich han angesehen di andaht der geistlichen levt datz Raitenhaslach vnd di trew di mein vater hat gehabt zv dem selben goteshvs wan er vnd ander mein vodern da sint begraben vnd habent mir dar an erzaiget die trew di si habent gehabt an ir lesten zeitenb zv dem vorgenanten gvteshse daz Raitenhaslach vnd dar vmb han ich mir pei minem lemtigemc leibe vor manigen jaren vnd awch nv min grab da erwelt daz ich da wil begraben werden in mines vater grab Darveber han ich angesehen den rainen gotesdienst der da emtzichlichen geschiht vnd han vnser frowen vnd dem goteshus datz Raitenhaslach geschaffet minen hof datz Wannting ze einem ewigem selgret Vnd daz disev rede stat vnd vest vnd vnzebrochen sei vnd beleih vnd avch niemen mvege noch ensvel weder ich selbe oder ander iemen daz vercheren oder zebrechen han ich disen brief versigelten mitd minem insigel gegeben dem vorgenanten goteshvs datz Raitenhaslach Des sint gezivch der ersam abbt her Hainr[eich] von Alderspache brvder Albreht brvder Vlr[eich] brvder Seibot brvder Ditrich sin priester vnd sin mvenich brvder Hainr[eich] vnd brvder Chvnr[ad] zwen mvenich von Walerbach her Hainr[eich] von Pfoelling maister Iohan der artzet Pilgreim min rihter von Chranichsperch vnd ander erberig levt