Charter Document - 02520228

Iohannes dei gracia Chymensis ecclesie episcopus universis presentes litteras inspecturis veram in omnium salvatore salutem Clamor infamie adversus dominum Perhtoldum plebanum sancti Iohannis de Lukental cum frequentia nos impulsans compulit ut de statu suo faceremus inquiri illam quam vulgi opinio de ipso denunciat suorum excessuum veritatem Cumque visitatores deputati a nobis ad nostram presentiam inquisita referrent et nos parati essemus iuxta formam inquisitionis formare censuram dictus P[erhtoldus] omne ius quod sibi in eadem ecclesia competebat in manibus nostris simpliciter resignavit Nos vero de consilio venerabilis fratris et amici in Christo karissimi domini Ch[unradi] venerabilis abbatis de Reitenhaslah dictum P[erhtoldum] sub hac forma fecimus in ecclesia sancti Iohannis vicarium temporalem ut si idem dominus abbas et fratres monasterii sui circa festum beati Iacobi nobis iurati retulerint dictum P[erhtoldum] sic esse vita et moribus emendatum quod tam ab ipsis fratribus quam a plebe dignus gracia reputetur nos de perpetuacione sua in eadem ecclesia sibi graciam que tunc conveniens nobis videbitur faciemus Quod si vite et fame dampnabile detrimentum in ipso meliora non suscipiet incrementa nos sine iuris strepitu alium clericum quem nobis abbas et conventus predicti monasterii duxerint presentandum curabimus investire de ecclesia memorata In cuius rei testimonium presentes litteras sigillo nostro fecimus sigillari Dat et actum in Vischaren anno domini MCCLXXVIII VI idus febr