Charter Document - 02520213
| Charter Number: | 02520213 |
|---|---|
| Cartulary Title: | Die Urkunden des Klosters Raitenhaslach : 1034-1350 |
| Charter Language: | Latin |
| Charter Origin: | Lay |
| Charter Type(s): | Grant |
| Date: | 1276 |
| Date type: | Internal, A.D., Feast |
| Resource Link(s): |
Monasterium.net |
Charter:
Ego Alrammus de Vttendorf notum facio universis presens scriptum inspecturis quod infirmitate corporali detentus sollicitus de salute anime mee testamentum meum presente domino C[hunrado] venerabile abbate de Raitenhaslach et fratre Vl[rico] capellano ipsius et servo meo Friderico de Aemingen taliter ordinavi inprimis delegavi cenobio beate virginis in Raitenhaslach curiam unam in Pischolfsdorf quam prius frater meus pie memorie eidem cenobio tradiderat post mortem meam absolute et libere possidendam Item ibidem eidem cenobio delegavi hvobam unam aput ecclesiam sitam in qua ad presens residet quidam nomine Wernhardus Item ibidem molendinum unum Winkelmvoel dictum quod obligatum pro novem talentis Salzburgensibus fratres predicti cenobii redimant iure perpetuo possidendum Elegi enim mihi in eodem cenobio locum sepulture cum predecessoribus meis qui ibidem in domino requiescunt Item delegavi cenobio dominarum in Lantshvt curiam unam in Ort sitam quam pro X talentis obligatam sorores eiusdem cenobii solvant iure perpetuo possidendam Item cenobio dominarum in Pvoelenhouen ubi due sorores mee in religione deo serviunt delegavi quicquid eadem habet ecclesia iure obligacionis in proprietatem addita etiam curia que dicitur Westerhouen Item cenobio in Ranshouen delegavi predium unum in Hartper situm scilicet extra villam Item cenobio in Puern delegavi in Phaefsteten duas dimidias hvobas obligatas Tiemoni pro V talentis minus LX denariis Ratisponensibus Item ecclesie beate virginis in Mverkirchen delegavi curiam unam que dicitur Rufa Stupa Item ecclesie in Schazzhoven delegavi hvobam unam que taberna nuncupatur ut per hanc reconciliacionis beneficium consequatur Item Puchario dedi in Phefsteten dimidiam hvobam iure obligacionis pro alia quam sibi ibidem acceperam Item cuidam domine per me impregnate dedi curiam unam in Smidhaim obligatam cuidam Hardario nomine et predium ibidem pro duobus talentis Salzburgensibus obligatum Item servo meo Friderico de Aemingen dicto tres hvobas in Pischolfsdorf et quicquid habeo in Hartper sive obligatum sit sive non tradidi hac de causa ut cruce signatus transfretare in remedium mee anime non ob mittat In huius testimonium evidens et cautelam presenti scripto sigillum meum appendere dignum duxi in die sancti Marcelli martyris anno domini MCCLXXVI