Charter Document - 02520165
| Charter Number: | 02520165 |
|---|---|
| Cartulary Title: | Die Urkunden des Klosters Raitenhaslach : 1034-1350 |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1264 |
| Date type: | Internal, Calendar, Papal |
| Resource Link(s): |
Monasterium.net |
Charter:
Urbanus episcopus servus servorum dei dilecto filio abbati monasterii sancte Marie in Ruitenhaselach Cisterciensis ordinis Salzeburgensis dioecesis salutem et apostolicam benedictionem Exhibita nobis tua petitio continebat quod nonnulli monasterii tui monachi et conversi pro violenta iniectione manuum in se ipsos et quidam pro detentione propra alii etiam pro denegata tibi et predecessoribus tuis obedientia seu conspirationis offensa in excommunicationis laqueum inciderunt quorum monachorum quidam divina celebrarunt officia et receperunt ordines sic ligati quare super hiis eorum provideri saluti a nobis humiliter postulasti De tua itaque circumspectione plenam in domino fiduciam obtinentes discretioni tue presentium auctoritate concedimus ut eosdem excommunicatos hac vice absolvas ab huiusmodi excommunicationum sententiis iuxta formam ecclesie vice nostra iniungens eis quod de iure fuerit iniungendum proviso ut manuum iniectores quorum fuerit gravis et enormis excessus mittas ad sedem apostolicam absolvendos Cum illis autem qui facti immemores vel iuris ignari absolutionis beneficio non obtento receperunt ordines et divina officia celebrarunt iniuncta eis pro modo culpe penitentia competenti eaque peracta liceat tibi de misericordia que superexaltat iudicio prout eorum saluti expedire videris dispensare Si vero prefati excommunicati scienter talia non tamen in contemptum clavium presumpserunt eis per biennium ab ordinum executione suspensis et imposita ipsis penitentia salutari eos postmodum si fuerint bone conversationis et vite ad gratiam dispensationis admittas Proprium autem si quod habent dicti monachi et conversi in tuis facias manibus resignari in utilitatem dicti monasterii convertendum Dat apud Vrbem veterem II non aprilis pontificatus nostri anno tertio