Charter Document - 02520142
| Charter Number: | 02520142 |
|---|---|
| Cartulary Title: | Die Urkunden des Klosters Raitenhaslach : 1034-1350 |
| Charter Language: | Latin |
| Charter Origin: | Religious |
| Charter Type(s): | Grant |
| Date: | 1257 |
| Date type: | Internal |
| Resource Link(s): |
Monasterium.net |
Charter:
W[altherus] divina miseratione abbas in Raitenhaslach cum omni fratrum suorum collegio dilecto in Christo amico domino Ot[toni] de Rifersperge strenuo militi cum sinceris orationibus salutem in omnium salvatore Cum piis desideriis iustisque devotionibus equitatis ratione merito sit annuendum dignum duximus vestris affectibus presentium tenore sicut desideratis parendum in quo et affectuia vestre petitionis simul et auditui nostre accomodationis scriptis satisfacere curavimus Hinc est quod universorum fidelium quorum conspectibus hec presens fuerit littera presentata equum duximus noticie et memorie insinuandum quod prefatus miles in remissionem suorum peccaminum consensu domini sui Sifridi de Frowenhouen predium Frilingen contulit dicte ecclesie in Raitenh[aslach] ad eos usus quo memoratus dominus S[ifridus] suum cernitur contulisse Sub cuius nichilominus etiam memoria aput nos necnon in domibus nobis attinentibus fraternitatis iura recipiendo sepulturam sibi ibidem elegit sed et dictum predium annuali censu dimidie libre Ratisponensis monete estimatione computatur unde et idem usus dicte ecclesie post obitum ipsius primo cedere videtur medio autem tempore singulis annis horum omnium in testimonium ecclesie XXX denarii assignabuntur