Charter Document - 02520069
| Charter Number: | 02520069 |
|---|---|
| Cartulary Title: | Die Urkunden des Klosters Raitenhaslach : 1034-1350 |
| Charter Language: | Latin |
| Charter Origin: | Religious |
| Charter Type(s): | Confirmation |
| Date: | 1227 |
| Date type: | Internal, A.D. |
| Resource Link(s): |
Monasterium.net |
Charter:
In nomine domini Eberhardus secundus Salzburgensis archiepiscopus a[postolice] s[edis] l[egatus] in perpetuum Ad maiorem evidenciam eorum que a nobis vel coram nobis pro diversitate negociorum fieri solent volentes posterorum utilitati et cautele presencium perpetuo providere presenti scripto cunctis declaramus quod venerabilis frater noster Wicpoto abbas Admvntensis in nostra presencia Salzpurch constitutus de nostro consilio nostraque voluntate necnon de rato capituli Admvntensis assensu huiuscemodi contractus iniit cum Hainrico de Tivsndorf vicedomino nostro quod eidem Hainrico pro necessitate ecclesie sue vendidit tale predium quale videlicet nobilis matrona domna Dyemvdis de Hegil ecclesie Admuntensi contulerat iuxta Suram fluvium apud Wengi duas videlicet curtes cum omnibus attinenciis suis quesitis et inquirendis pro LXXX marcis argenti Accessit eidem Hainrico in hoc contractu quod abbas et fratres sibi contulerunt in proprietatem quoddam beneficium aput Govchispach quod ipse ad annuum censum prius habebat et quod dimidium talentum preter alias utilitates persolvebat Actionis huius testes fuerunt Chiemensis episcopus dominus Rudigerus dominus Albertus prepositus maioris ecclesie dominus Symon abbas sancti Petri Engelschalcus sancti Petri prior de ministerialibus Chvno de Gvetrat Otto castellanus de Werf Albero de Scherginperch et filii eius Hainricus et Dvringus de civibus Isngrimus et Vlricus salinatores Hainricus Tisinger Walchvon monetarius de familia domini archiepiscopi et Admvntensi quam plures Actum est anno incarnacionis domini MCCXXVII