Charter Document - 02520036
| Charter Number: | 02520036 |
|---|---|
| Cartulary Title: | Die Urkunden des Klosters Raitenhaslach : 1034-1350 |
| Charter Language: | Latin |
| Charter Origin: | Religious |
| Charter Type(s): | Grant |
| Date: | 1203 |
| Date type: | Assigned |
| Resource Link(s): |
Monasterium.net |
Charter:
In nomine sancte et individue trinitatis Ego Eberhardus dei gratia Salzburgensis archiepiscopus et apostolice sedis legatus in perpetuum [] Omnibus Christi fidelibus tam presentibus quam futuris notum esse volumus quod fratribus in Retinhasla ibidem deo servientibus cum assensu canonicorum in Salzburch necnon ministerialium nostrorum ecclesiam in Halspach cum filiabus suis sed et capellam in monte sancte Marie cum omni iure in perpetuum donavimus videlicet ut per hanc donationem eorum inopia temperetur nostra salus aput deum omnipotentem augeatur De cetero communicato consilio nostri et abbatis monasterii illius fratrumque suorum placuit nobis tam pro fama quam pacis concordia ut ipse abbas quemcumque velit assensu fratrum suorum idoneum sacerdotem et religiosum eadem ecclesia investiat unde habeat idem sacerdos subsidium huius vite in victu et vestitu ordinare procuret Racionabile nobis videtur ut ad ipsum spectent fidelium consolationes oblationes et minorum fructuum decimationes reliqua scilicet dotes census frugum decimationes in usus fratrum eorundem inconvulse sine omni dolo et circumventione in perpetuum transeant eadem de capella in monte sancte Marie quam nostra paternitate possident rata esse censuimus Ut notum sit omnibus quanto affectu et benivolentia ad ipsum monasterium movemur silentio tegere nolumus quod in propria persona super hoc factum privilegium a domino apostolico Innocentio eidem monasterio impetravimus et sui gratia optinuimus Predium Etiam quoddam quod adiacet grangie eorum que dicitur Harde cum attinent iis suis in perpetuum donavimus decimas quoque in grangia que dicitur Heringin et capellam in eadem grangia cum dote curiam nichilominus que appellatur Perchiem perpetua libertate confirmavimus decimas in parrochia Moringin quas propriis manibus vel sumptibus excolunt secundum privilegia apostolicorum in quieta possessione habere sanctimus Hanc paginam inpressione sigilli nostri firmare curavimus ne quisquam hominum hoc factum in irritum ducere presumat Si quis hanc paginam infringere temptaverit ex parte dei omnipotentis et beati Rudberti nostreque auctoritatis anathema sit [+] Ego Eberhardus Salzburgensis archiepiscopus ss [+] Ego Wernhardus maioris ecclesie prepositus ss [+] Ego Albertus Kyemensis prepositus ss [+] Ego Hartfridus decanus ss [+] Ego Hermannus ss [+] Ego Wernherus custos ss