Charter Document - 02520024
| Charter Number: | 02520024 |
|---|---|
| Cartulary Title: | Die Urkunden des Klosters Raitenhaslach : 1034-1350 |
| Charter Language: | Latin |
| Charter Origin: | Religious |
| Charter Type(s): | Confirmation |
| Date: | 1184 - 1193 |
| Date type: | Assigned |
| Resource Link(s): |
Monasterium.net |
Charter:
Ego Albertus dei gratia Salzburgensis archiepiscopus et apostolice sedis legatus universis Christi fidelibus tam futuris quam presentibus salutem in domino perpetuam Res ecclesiasticas per [] elemosinam pauperibus in cenobiis deo iugiter ac devote famulantibus erogare nichil est aliud quam temporalibus eterna transitoriis celestia bona comparare Pro istarum itaque commertio rerum dilectus ministerialis noster Meingotus cum coniuge sua fratres in Reitenhasela suis elemosinis indesinenter in sancto proposito non cessat sustentare Dedit autem prefatus vir cum coniuge sua nobili [] matrona eidem ecclesie v talenta in Hallensi salina ut anniversarius utriusque de eisdem a predictis fratribus sollempniter perpetuo agatur et in primo anno obitus utriusque a singulis sacerdotibus missa una in ebdomada et post anniversarium missa una ab aliquo sacerdotum semel in ebdomada perpetuo dicatur et a ceteris clericis qui missas non celebrant psalteria et a laicis fratribus Pater noster prout eis institutum fuerit persolvatur Decrevit etiam immo presenti scripto firmissime roborari voluit ut de predictis talentis duo sumantur quibus ipso anniversarii sui die per successus temporum dum durat seculum omni congregationi vino caseo et pulcro pane copiose serviatur Ordinavit et alia duo talenta ibidem sumenda in anniversario dilecte coniugis sue in usus tocius conventus similiter sumenda sed et quintum de sepedictis talentum cellerario nostro instituit dandum quatenus ad serviendum fratribus suis in prefatis anniversariis alacrem eum redderet ac strennuum In consecratione quoque altaris sancte crucis quod suis expensis construxit predium Hachenhseim situm in unum caritatis servitium delegavit quod secunda die dedicationis altaris sancte crucis ad instar prioris servicii debet preparari Preterea tres etiam curias unam Rvotheringin alteram Berge terciam Buchen dictam in alios sumptus fratribus intuitu dei contradidit Ne quis igitur abbas tam presens quam futurus huic tam pio liberalitatis proposito adversatus predictarum venerabilium personarum benedictionem mutare vel penitus annullare presumat cartulam hanc largitatis earum testem sigilli nostri impressione ipsis id omnimodis expetentibus munitam sciat