Charter Document - 02520022

Ego Chunradus dei gratia dictus abbas in Reitenhaselach memor beneficiorum a diversis personis publice et privatim nobis collatorum statui que nobis dominus Meingotus Salzeburgensis civitatis prefectus bona contulit presenti cedule annotare Dedit itaque prefatus vir illustres cum coniuge sua Diemut nichilominus commendabili matrona ecclesie nostre quinque talenta in Hallensi salina in assere qui dicitur Cholner ut anniversarius utriusque de eisdem a nobis et a fratribus nostris sollempniter perpetuo agatur et in primo anno obitus utriusque a singulis sacerdotibus missa una semel in ebdomada et una collecta id est Deus cui proprium in missa cottidiana perpetuo dicatur necnon et post exaltationem sancte crucis xx misse a quolibet sacerdote dicantur Insuper quamdiu vixerint una missa singulis ebdomadibus et xxx misse per singulos annos celebrentur a singulis clericis x psalteria qui psalterium ignorant mille quingentis vicibus Misere mei Deus vel tociens Pater noster additis etiam singulis diebus iiii prebendis pauperibus distribuendis Hec omnia pro domino Sibotone de Surberc in eternum agantur Decrevit etiam immo presenti scriptos firmissime roborari voluit ut de predictis talentis duo talenta sumantur que in copiosos fratrum apparatus ipso anniversarii sui die per successus temporum dum durat seculum expendantur Ordinavit et alia duo talenda ibidem sumenda in anniversario dilecte coniugis sue in usus tocius conventus nostri similiter consumenda sed et quintum de sepedictis talentum cellerario nostro instituit dandum quatinus ad serviendum fratribus suis in prefatis anniversariis alacrem eum redderet ac strenuum Ne quis igitur successorum nostrorum huic tam pio tante liberalitatis proposito adversatus predictarum venerabilium personarum benedictionem mutare vel penitus annullare presumat cartulam hanc largitatis earum testem sigilli nostri impressione ipsis id omnimodis expetentibus munitam sciat Preterea duas etiam curias unam Rutheringen et alteram Berge vocatas ecclesie nostre contulit Tradidit etiam nobis et tercium predium quod Buchen est dictum Super his et huiuscemodi beneficiis ab eo nobis collatis immo adeo sibi reservandis et in futura vita re signandis ipsi votis omnibus congratulamur non tam datum quam dantis requirentes fructum