Charter Document - 02520012
| Charter Number: | 02520012 |
|---|---|
| Cartulary Title: | Die Urkunden des Klosters Raitenhaslach : 1034-1350 |
| Charter Language: | Latin |
| Charter Origin: | Religious |
| Charter Type(s): | Grant |
| Date: | 1161 |
| Date type: | Internal, A.D., Episcopal |
| Resource Link(s): |
Monasterium.net |
Charter:
Ego Chunradus dei gratia Patauiensis episcopus cunctis ecclesie nostre Christique fidelibus salutem in domino perpetuam Res ecclesiasticas per elemosinam pauperibus et in cenobiis deo iugiter ac devote famulantibus erogare nichil est aliud quam temporalibus eterna transitoriis celestia bona comparare Pro istarum itaque commercio rerum tam feliciter et optime venalium preces monachorum sancte conversationis de Reitenhasela auribus propiciis exaudivimus eisque quantum nobis licuit nostris dumtaxat in temporibus decimas suarum in Austria vinearum ad ius nostrum et episcopalem portionem pertinentes pro spe nostre salvationis largiti sumus Item hanc gratiam in diebus vite nostre a nobis volumus ut optineant quod bona sua navibus imposita apud Pataviam gratis sine nautico theloneo quod etiam de nostro iure est quiete transeant Successores itaque nostros pontifices ad eandem misericordiam cum modo dictis fratribus consequenter adimplendam exhortantes in domino rogamus quatenus in continuato erga pauperes quales prenotavimus beneficio speratam retributionem deo quandoque largiente percipere debeamus Denique ut fideles quoscumque et maxime successores post nos episcopos huius actionis et elemosine memores faceremus presenti pagine nobis precipientibus conscripte sigillum nostrum infra sicut evidens est affigi iussimus Data Patauie anno post incarnationem domini millesimo CLXI indictione VIIII anno vero nostri pontificatus XIII III n octobris feliciter amen