Charter Document - 02510101

Wir Ott des Heiligen Romischen Reiches Erczkamrer Kurfurst vnd wir Fridreich sein vetter Bayd von Gotz genaden pfallentz grafen bey Rein vnd Hertzogen in Beyern [] Bechennen vnd tun chunt offenleich mit dem brif daz wir den Ersamen vnsern lieben diemutigen dem Probst vnd gemeinlichen dem Capitel vnsers Gotzhauz zu Ranshofen durch vnserr vodern vnsers va o ter seligen vnd vnserr sel Heil willen di besunder genad getan haben vnd auch tun mit chraft ditz brifz vnd haben in den Hof zu Aufhausen der vor von vnsern genaden zu lehen gewesen ist Mit allen zugehorn wie die genant sind geaigent vnd aygen in vnd dem Gotzhaus den auch mit chraft ditz briefz fur ein rechtez freyes ledigs aigen vnd gebieten allen vnsern Amptlawten vicztumen Pflegern Richtern scherigen vnd allen andern wie di genant sind di wir iczo haben oder furbaz gewinnen vestichlichen by vnsern genaden vnd hulden daz ir di obgenanten vnserr lib diemutig vnd daz Gotzhaus by den Obgenant genaden behaltent vnd sy von vnsern wegen darzu beschirment Mit vrchund ditz brifs den wir in geben Hie zu Purchausen an sand Jorgen abend versigelt mit vnseren anhangenden Jnsigeln Nach kristi gepurtt drewczehen Hundert iar vnd darnach in dem Nawn vnd Sibnczichstem Jaren