Charter Document - 02510099

Ich Chunrat der Noetleich mein Hausfraw vnd alle vnser Erben veriehen vnd tun chunt offenbar an dem prief Daz wir mit wolbedachtem muet vnd nach vnserr brueder Rat Friedreichs vnd Nikles vnd auch nach andrer vnserr frewnt Rat vnd gemainleich nach der Purger Rat ze Prawnaw Daz wir dem Erwirdigen Herren Herren Stepfan Probst ze Ranshofen vnd dem Covent da selben gegeben haben vnserr Haus vnd Hofstat daz gelegen ist ze Prawnaw hinder der Chirchen mit allen den ern rechten vnd nutzen di dar czu gehorent vnd da von bechomen mogen besucht vnd vnbesucht alz wir ez selber ynn gehabt vnd genossen haben vnd haben auch yn daz auf geben vnd richtig gemacht mit der purger hant vnd schullen auch dez selben Hauss ir gewer sein alz der Stat ze Prawnaw recht ist Tatten wir dez nicht swelherlay schaden si dez namen den selben schaden schullen vnd wellen wir yn gar vnd gancz ab tun vnd wider chern an allen iren schaden Vnd daz schullen si haben dacz vns vnd dacz vnsern trewen vnd dar czu auf aller vnser hab swo wir di yndert haben besucht vnd vnbesucht Vnd mogen si sich wol vnderwinten an recht oder mit recht alz verrer vncz daz si an schaden beleibentt vnd haben yn dar zu geben andert halb Hundert pfunt gueter wienner pfenning der wir sew gar vnd gantz verricht vnd gewert haben an allen iren schaden vnd haben daz also getann durch vnserr Sei Hail vnd durch vnserer voruodern willen Jn solicher beschaiden mit vnserm gueten willen daz vns der Egenant Probst vnd der Couent da selben besorgen vnd ausrichten schol ein Ewigew Messe yn der stat ze Prawnaw alz der prief lawt den wir vnd die Stat ze Prawnaw von yn dar vmb ynne haben Daz in vnd vns daz allez stat vnd vnzerbrochen beleib geben wir yn den prief vnder meinem aygen anhangunden Jnsigel versigelten vnd dar zu zun einer pezzern bedachnuzz vnd statichaich vnder der stat ze Prawnaw Anhangunden Jnsigel versigelten die daz durch vnserr vleizziger Pet willen an den prief gehangen hat ir der stat an schaden Dar vnder sich verpi[n]tt mein Hausfraw vnd alle vnserr erben mit iren trewen allez daz stat ze haben daz oben an dem prief geschriben stet Der prief ist geben do man zalt von Christez gepurt drewczehen Hundert Jar vnd dar nach yn dem siben vnd Sibenczigisten Jar an sand Michels Abent