Charter Document - 02510096

Wir Stephan der elter wir Stephan und Johanns gepruder desselben herrn Stephan des eltern sune alle von Gotes genaden pfallentzgraven bey Rein und hertzogen in Beyern [] bechennen offenlich mit dem brief umb den grotzen schaden und gebrechen den der erwirdig geistlich man der brobst von Ranshofen das kloster und das convent gemainlich daselben manig zeit bisher von krieg unfrides schawer pyses und ubriger gastung wegen genomen habent und noch taglich nement haben wir demselben prost dem gotzhaws und dem convent gemainlich zu Ranshoven die besundern genade getan und tun auch mit chraft ditz briefs also daz wir si gefreyet haben von aller gastung und ueberladung wie die genant mag sein biz auf die pfingsten di nu schirist choment und darnach uber drew ganzer jare mit der beschaiden daz si in derselben zeit niemant wie der genant oder gehaizzen mag sein er sey edler oder unedler hoher oder nidern mit chainerlay gastung noch ueberladung nicht beswaren noch uberladen sol in chain weis ausgenomen wenn wir mit unzer selbers leiben dahin chomen Und darumb gebieten wir Gorigen dem Aheimer unserm viztum in Nydernbayern und allen unsern amptlawten wie di genant sind di wir jezu haben oder furbaz gewinnen und sunderlich unserm pfleger und richter zu Weilhart ernstlich bey unsern genaden und hulden ob si jemant wie der genant war an den vorgenanten unsern genaden mit chainen sachen laydigen oder beswaren wolte daz ir si dann von unsern wegen trewlich davor beschirmet und behaltet und des nicht gestattet in chain weis als lieb ew unser genad und hulde sein wann wir nicht lenger gestatten wellen das unser kloster als parlich verderben und wan wir auch die genad und freyung allen unsern klostern in Nydernbeyrn getan und gegeben haben Mit urchund des briefs den wir obgenant drey herrn in geben mit unsern anhangenden insigeln versigelten der geben ist zu Burchausen am freytag vor sand Gorigentag anno domini MCCCLXXIII