Charter Document - 02510093

Wir Stephan der elter wir Stephan und Fridrich gebruder von Gotes genaden pfallentzgrafen bey Rein und herzogen in Bayrn grafen zu Tyrol [] bechennen offenleichen mit dem brief das wir unsern lieben dyemutigen dem probst und dem convent gemainleichen des chlosters zu Ranshofen di besunder genad getan haben und tun auch mit dem brief also das wir si gefreyet haben vor aller gastung wie die genant oder gehaizzen mag sein auf sand Marteinstag der nu schirst kumpt und darnach uber zwai ganzeu jar ausgenomen wan wir mit unser selbers leib dasein Und darumb gebieten wir allen unsern amptlauten vitztumen pflegern richtern schergen und allen andern wie die genant sind die wir ietzu haben oder furbaz gewinnen ernstleichen bey unsern genaden und hulden und besunderleichen unser stat zu Prawnaw ob sy yemant mit dhainer gastung in der obgenanten zeit beswaren wolt wie der genant oder gehaizzen war das ir si dann trewleichen davor beschirmet und nicht gestattet das si yemant daruber mit gastung beswar in chain weis daz ist unser will und wort mit urchund ditz briefs den wir in obgenant hertzog Stephan der elter und hertzog Stephan der junger geben mit unsern insigeln versigelten darunter wir uns hertzog Fridrich mit unsern trewen verbinden alles das stat zu haben und zu volfuren das oben geschriben stet wann wir zu den zeiten insigill bey uns nicht enheten Geben zu Purchausen an erichtag vor Galli anno domini millesimo trecentesimo sexagesimo sexto