Charter Document - 02510090

Wir Ludwig von gotes genaden Romischer Keiser zu allen zeiten merar des Reichs [] Bekennen vnd tun chund fuer vnss vnd vnser erben offenlich mit disem brif dass wir den Erbern geistlichn mannen dem Brobst vnd dem Conuent des gozhaus ze Ransshofen vnsern lieben diemutigen durch got vnd ze einem rechten vnd ewigen Selgerat alle die gut vnd Vrbar mit dinst vnd gult besucht vnd vnbesucht die wir in dem dorff ze Rannshofen nyden vnd oben dass gelegen ist bei demselben Kloster gehabt haben fuer ein rechts freys vnd ledig aygen gegeben habn vnd gebn auch mit disem brif vnd haben auch den Altar der auf dem gewelben stet vnd den Brobst Wernher in vnser Frauen ere gepauet vnd gemachet hat mit denselben guten vnd Vrbaren vnd auch mit andern gutn dy wir vormalens darzu geben habn ewiklich gewidempt also dass man alle tag auf demselben altar ein Mess habn vnd sprechn sol vnd vnser vnd [vnser] Vorvodern vnd nachkommen sele ewiklichen gedenkhen vnd sol auch der Brobst dem Priester der die Mess spricht vnd halt all tag drey Salzburger pfenningen richten vnd geben die furbas in dess Conuents Oblay werden vnd gefallen sullen vnd dieselben gut Vnd dieselben gut vnd vrbar alle sullen sy jnnen habn vnd nyessen mit alln rechtn eren diensten nuzen vnd gulten die darzu gehornt vnd dauon geuallen muegen vnd auch die bestifften vnd entstifften besezen vnd entsezen als ir rechtes aygen durch recht an alle vnser erben vnd ambtlaut vnd aller menyklich jrrung vnd hindernussen vnd sullen auch dieselben gut vnd Vrbar ab vnserm Salbuch vnd Chastenpuch getan vnd vertillget werden Wurden sy aber furbas daran geschriben funden dass sol weder kraft noch macht haben vnd dem Brobst vnd dem Conuent khainen schaden bringen wans wir vns der fuer vns vnd vnser erben vnd nachkomen gaenzlich verzigen haben Sy sullen auch vber dieselben gut vnd vrbar vnd vber die laeut die ewiklich darauf sizen alle die gericht haben die sy veber ander ir aygen laeut vnd gut habent an vmb dy drey sache die an den tod gend dass ist Tyef Notnunft vnd Todschlag dy wir vns vnd vnsern Ambtlaeuten den Obristen ze richten behaltn haben Vnd darueber ze einem vrkunt geben wir jn disen brif mit vnsern keiserlichen Insigel versigelt der geben ist zu Burkhausen an Erichtag vor Gozleichnams tag do man zalt von Kristi gepurd MCCC Jar darnach in dem xlv Jar vnd in dem xxxi Jar vnsers Reichs vnd in dem xviii vnsers Keisertumbs []