Charter Document - 02510089

Wir die genanten und die Gmain von der Statt zu Braunau veriehen offenbahr an disen Brief und tun chund allen den die ihn sehent oder horen lesen dass wir von gemainer Statt und wohlgedachten Muet durch unser und aller unser vorderm Seel willen den erwurdigen Herrn Ulreich Probst und dem Convent zu Ranshoven und irm Gotzhaus gehaissen und gelubt haben zegeben und ausrichtig zemahhen alle Jar xiv Pf Guts und Nuzs Gelts Salzburger Pfen und schulen Si des verrichten in Selgrez gwer als Landsrecht ist darumb dass ein Herr den sie uns zu einen Pfarrer gebent furbas ewichlich bei uns in der Statt zu Braunau mit aynen Gesellen er sei geistlich ader weltlich hauslich sizen und Wonung haben soll unverzigen aller der pfarlichen Recht der wir in und irm Gotzhaus und auch der Pfar zu Ranshoven schuldig und gebunden seyn nach irn alten hanntuesten es sey an Grabnus oder an anderen Sachen Es soll auch derselb Pfarer und sein Gesell all Tag zwo Messen haben ein Frumes und ein gewondleich Ampt und alldieweil wir sy und ir Gotzhaus der obgenanten xiv Pf Gult nit gewert und genzlich verricht haben sullen wir in alle Jar von unser Statt xiv Pf Salzburger Pfen gebn und sullen sy die wern und genzlich berichten iarleich an sand Martenstag Taten wir des nicht welcherlay Schaden sy des namen den ir zwen der Probst und wer ihr Chelner ist bey irer gewissen sagen mugen den sullen wir in gar und genzlich ablegen an alle wider Red Wir veriehen auch dass wir dem vorgenantem Probst und Convent durch Lieb und Gehaym die wir zu dem Gotzhaus Ranshoven haben und auch dass sy der vorgeschriben zwayer Messen des pas zukomen mugen die Recht die hernach geschriben sind ewichleich in unser Statt zu Braunau geben haben zu dem ersten dass wir gebunden und schuldig sein dem Herrn den sy uns zu einen Pfarer gebent aller der Recht und Gewanhait die Purkhauser oder Ottinger irm Pfarer schuldig und gebunden sein Es soll auch furbas ewichlig von uns und unsern Nachkhomen unbesteurt beleiben alles das dass sy heut zu Tag bey uns in der Statt habent das ist das Hauz bey der Kirchen dass emaly gewesen ist haugen von Lau und drey Pruttisch und ein Stadel den sy habent zenegst dem Nadler und auch die Herwerg die wir dem Pfarrer geben haben Wen wir auch ein Schuellmeister verdingen welln so sullen wir den Pfarer dabey habn und sullen dem Schullmeister sagn dass er noch anders yemandt kheynarlay Recht noch Vorterung datz unser Pfarer sullen haben weder an Opfer noch an andern Sachen nur was der Pfarer von sein selbers zuchten und beschaiden gern tuen will Wir veriehen auch dass furbas ewichlich khainen Orden es sey Prediger Parfuesser Augustiner oder wie sy genant sein khein Behausung oder Wonung in unser Statt geben sullen noch widervarn lassen an der vorgenanten Herrn Gunst und guten Willen Wir sullen auch dem obgenanten Gotzhaus zu Ranshoven die vorgeschriben Recht und Beding bestattn und bevestn mit unsers genedigen Herrn Herzog Hainrich [] offen Brief Dass das also stat und unzerbrochen verbleib geben wir in disem Brief versigelt mit unser Statt Insigel der geben ist als man zalt von Christi Geburt MCCCXXXVI Jar an sand Gregori Tag