Charter Document - 02510087

Charter Document - 02510087


Charter Number: 02510087
Cartulary Title: Kloster Ranshofen Urkunden (Augustiner-Chorherren 898-1813 [1350])
Charter Language: German
Charter Origin: Lay
Charter Type(s): Confirmation
Date: 1332
Date type: Internal, A.D., Feast
Resource Link(s): Monasterium.net

Charter:

Wir Ott von Gots Genaden Pfallnzgraf ze Rein vnd Hertzog in Baiern veriehen offenbar an dem Brief wann fur uns chomen sint der ersam Probst Ulreich von Ranshoven vnd sein Capitel vnd habent uns furgelegt und gechlagt datz si manigen weitz beswaert wurden an ir Laeuten und Guten wider die Rechtichait und wider den Vreytum den ir Gotshaus haben sol als es von alter her gestiftet und gewidemt ist und wann wir demselben Gotshaus ze Ranshofen besunder Genaden schuldich und gebunden sein als unser vodern an uns bracht habent datz wir sein und seiner Laeut und Gut Vogt und Schermer sein haben wir nach unsers Rates Rat demselben Gotshaus bestatigt und statigen mit diesem Brief auch im alle die Recht Freytum und Genade hantvest Brief und Urchunde als im von Paebsten Chaisern und Chunigen und von unsern Vodern sint gegeben und von Grafen Freyen Dienstmannen und andern Laeuten edeln und unedeln von der Zeit do dazselb Chloster von erst ist gestiftet untz auf disen heutigen Tag Sunderleichen statigen wir demselben Gotshaus den Freytum den ez innerhalb der Portten dez Chlosters haben sol Und davon wollen wir und gebieten allen unsern Amptlaeuten und gemainlich allen den di in unserm Lande gesezzen sint edeln oder unedeln swi di genant soint vestichleich bei unsern Hulden datz si dem obgenanten Gotshaus ze Ranshoven seiner Recht Freytum und Genade swie ez di hat oder haben sol an seinen Laeuten und Guten an Gerichten an Vischwaiden und an allem Gesuch ze Holtze und ze Velde und gemainlich an allen Sachen innerhalb und auzzerhalb dez Chlosters staet behalten und unbechrenchet und auch ez daran cheiner weitz mit nichten irren engen noch beswaeren als si unser swaer und grozz Ungenade darumb wollen vermeiden Und daruber ze einem staetem Urchunde geben wir in disen Brief mit unserm Insigel versigelten der ist geben ze Purchausen do man zalt von Christes geburt dreyzehenhundert jare darnach in dem XXXII jar an s Goergen tag