Charter Document - 02510075

Ich Chunrat der Grans Richter datz Weilhart tun chunt allen den di disen Brief ansehent oder horent lesen Daz ich daz Guet daz Hueb in dem Weilhart bi Pfaffenhoven chauft han mier und meiner Hausfrawen Getrauten und allen meinen Chinden swi si geheusen sint von Abt Friderich von Raitenhaslach und von der Sammung desselben ebichlichen in rechter aigener Gwer mit ir gueten Willen und mit ir gmainer Gwissen umb funf und zwainzich Pfunt Regenspurger Pfenning und habent mich desselben Guetes aigenchleich gesatz in nutz und in Gwer versucht und unversucht ze Hof und ze Veld mit aller Statigung und Vestigung und Orthabung di daz uber gehoert von ir Chloster und von ir Orden als an ir Hanfest endichleich staet di si mier uber daz Guet datz hueb gegewen hawent Daz selb Guet datz hueb mit samt derselben Hanfest han ich gegeben mit gueten Willen meiner Hausfrawen und meiner Chind swi si gehaissen sint mier und in zu einem Selgraet sant Pancrazen und Probst Chunraten und dem Convent ze Ranshoven ewichleich fur rechtes aigen und han seu des gesatz in nutz und in Gwer und bin sein auch Jar und Tag ir Gwer als ich ze recht [sol] Daz deu Sach an dem vorgenanten Guet dem Gotzhaus ze Ranshoven beleib staet und unzebrochen an allen Chrieg han ich in gegewen disen Prief zu einer Wornung und ze einer gantzer Sicherhait verinsigelt mit meines Herren des Abtz Ulriches Insigel von Pouwern und mit meinem Insigel Datz ist geschehen do von Christs Purt worn tausent Jar zwoi hundert Jar und neun und neuntzig Jar datz Neunchirchen in dem Weilhart in der offen Schrann an sant Symons Abent