Charter Document - 02510073

Ich Jans von Ror tun chund allen den di disen Brief ansehent und horent lesen daz ich an der Vogtai uber Ranshover gut anders Rechts nicht han noch ander nimen nach mir ze recht haben sol uber daz selb Gut dan von einem gantzen Hof vier Metzen Vueters und von der Hueb zwen Metzen und von dem Lehen ainen nur zwaimal in dem Jar und van dem haus ein huen auch zwaimal in dem Jar Ich han auch an den Wandeln nicht rechts wan deu mit Haift geschechent Ist aber daz dehain des Gotshaus man von Ranshoven auz der Gwalt chert oder anders enphert an des Probsts Ammans Urlaub swaz des Wantels suldich wirt des sullen daz Gotshaus angehoren und mich das drittail und swaz des Gotzhaus Amman von den Laeuten nicht wol gerichten mag daz sol er mich anpringen und scholl ich den Amman und diu Laeut daran verrichten und scherm als verr ich chan und mag Ich sol auch der Vogtai nicht anwerden noch chain mein Gerib wir pitten ee daz Gotzhaus an dieselben Vogtai und swo ich diu vorgenanten recht ubervar unpilleich und unzeitleich so ist mein Vogtai uber dieselben Laeut und uber daz selbe Gut ledig worden vreileich dem Gotzhaus datz Ranshoven Datz die Sach und di vorgenant Recht dem Gotzhaus daz Ranshoven stet beleib und unzebrochen von mir und von meiner after Chunft gib ich disen Brief zeinen Urchund und zeiner Sicherheit dem Convent datz Ranshoven verinsigelt mit meines Herren Insigel des erbern Abts Friderich von Chremsmunster und mit meinem Insigel und Herren Chunrats des Stals von Julbach Diser Sach seint Ziug Herr Friderich von Chamer und Ulreich der Rot und Ulrich in dem Ort und Friderich sein Bruder und Chunrat der Laiterbech und ander Biderb Lieut Diser Brief ist gegeben do von Christ Geburt warn tausent und zwaihundert und niun niuntz Jar an sant vincencen Tag datz Chremsmunster