Charter Document - 02510068

Wir Wernhart von gotes gnaden bischolf ze pazzauv beiehen an disem prief offenlichen daz prost chunrat von Ranshouen ward geirret von sinen vmsaetzen an einem schimpfhus daz er wolt gemachet haben sinem haus in dem wert als uerre vntz das im vor recht an der Shrann wart weisung ertailt vef di hofstat Darnach vnt div hofstat ward geschout do zvgen wier die weisung von der schrann in vnsern hof vnd do wier in gerichttes weiz sazzen vnd di wegisten vnd die pesten vnsers rates vnd uon der stat vor uns woren Do sagten Seifrit der vaist vnd engelschalich der puchher in zeuksweis pei ier aide nach vnserr frag daz daz schimpfhaus daz der uorgenant brobst machen wolde der stat vnd den livten an schaden wer vnd das er sin wol recht hiet vnd das si dem probst wol gestanden weren daz wart gmainchleichen vervoligt auch sagt im gmainen frag vud vrtail daz er svlt vf sinem aigen povn swos er wolt vnd svlten wier oder vnser Richter an vnserr stat im daz schermen vor gwalte vntz daz im daz pav mit recht verpoten wurde so sult dann geschehen dar vrber swos recht were daz im daz behalten werd daz gebieten wier vestichlichen pei vnsern hulden vnd gewen disen prief ze vrchunde mit vnserrn insigel versigelt Der ist gewen ze pazzav do von Christz purd worden vergangen Tausent iar zwaihundert iar in dem Sechs vnd Neunzigistem iar an sant Maximilians tak Dez sint zivg her Meingos von woldek Maister Engelschalich chorherren Her Hainreich von Radek Pero der shench Vlreich der grof von furstenekk Pilgreim der shench Ott alber vnd lvdweich schreiber Der Meinhalm von watzmanstorf Sighart der Statrichter Gundachker der alt Richter vlreich von Regenspurch albrecht der hofmaister Ortel der golt Seifrit der faist vlreich der Sokkinger hainreich der westerburger Engelshalich der Pucher Chunrad der iude Hainreich vnd Chunrat di frivnt Perchtold an dem Portz vnd ander piderb livt