Charter Document - 02510058

Wir Chunrat uon gotes gnaden propst ze Ranshouen vnd all di sammung do selben tun chund allen den di disen prief an sehent daz wir durch di triwe vnt durch di fuedrvng di der erberig man Her Chunrat der stol uon julwach vns hat frivntleichen getan daz er vns hat gegewen zehen pfvnt regenspurger ze stevwer an vnser freivng datze aschach haben wier im mit gemainem rat vnd mit guetem willen gelopt daz der probst unt dev sammung ze Ranshoven aller iaerchlichen ebichleichen pei im lentigem vnt pei iem toten an dem abenten sancti johannis den man nennet ante portam latinam hern Chunraten dem stol vnd fron elspeten seiner hausfrawen vnt aller ir forvodern vnt ier nachchunft iartag pegen soln mit ter toten ampte ebichleichen vnd daz daz dester andechtichleicher geschech so sol der propst oder der chelner aller iaerchleichen an dem uorgenanten sancti iohannis abenten der sammung schechs schilling otinger anlegen ze pezzrvng der pfrvnt unt sol dev pfrvent doch gantz beleiwen Geschieht aver daz daz der toten ampt oder dev pezzrvng der pfrvent wiert verlazzen oder ver shavmpt so sol der probst oder der Chellner oder swer des gesheftes pfligt ob nicht probs ist alz lang den chirchkanch meiden vnt in dhain chirchen chommen vntze daz daz ampt vnt die pezzrvng werden gantzleichen getan dar uber ueriehen wier an disem prief daz wier staet vnt vnzeprochen wellen hawen die prief vnt di hantfest di vnser gaistleich vater Bischolf wernhart von pazzaw hat gegewen nach vnserm willen vnd nach vnser bet vber di sach vnt dar vwer gewen wier dise prief versigelt mit vnserm insigel ze vestung vnt geworhait Diser sach sint zevg Her Hainreich uon Schavnwerch der elter her Hainreich sein veter von Schavnwerch Her wernhart auch sein veter Her Hoertweich von plonchenpach wernher von rotenvels Rudolf der stol wolfram der stol Hainreich der harder fridreich der swob ainweich probsts Chunratz pruder Dietreich der Helblinch wernher der cholb dise prief sint geshriwen vnt gegewen datz ranshouen Do von christz purd worn vergangen Tausent iar zwai hundert iar vnt zwai vnt nevnzik iar an dem vierden tag nach sant Timotheis tag