Charter Document - 02510057

Ich Eberhart der Schreier und min Pruder Leutolt verjehen und tun chund allen den die den Brief lesent und gesehen Daz wir baide einen Wechsel haben getan mit dem Probst und mit dem Convent ze Ranshofen daz wir Sand Pancratio und dem Closter haben gegeben unser Gut datz dem Aihen ze rechte in aigen versucht und unversucht umb ein Gut haizzet datz dem aigen zwischen Elling und der Golthub Und haben in gelobt ob jeman wer der in daz Gut ze Chrieg tetet oder tun will daz wir dez ir Gwern suln sin alz recht ist Daz wir daz mit ichtes gechrenchen oder verchern mogen daruber gegeben haben wir in unsern Brief ze ein Staetigung und ze einem Urchund Mit unsers Herrn des elteren Herrn Hainrichs von Schaumberch Insigel mit disen geziugen Herr Chunrat der Stol Arnolt der Teispech Hainricus de Harder Ulreich von Hohenfeld Der Friderich von Elling Ulreich von Elling Der Wechsel ist geschehn do von Christes Purt war tausent Jar zweihundert Jar in dem ain und neunzigsten Jar an Sand Philippes und Sand Jacobs Tag