Charter Document - 02490082

A tous ces qui verront ces presentes letres freres Jehans abbés et touz li convanz de Quincy salut Saichiez tuit que com Sevestres li Maiselier de Cusey et su compaignon haussient achetée dou seignor de Naelles la paisson de ses bois de Naelles an l'an de grace m et dous cenz et iiiixx et ii la quele paisson nos povons et devons chiescune année motre lx pors et li devant diz Sevestres nos promit que nos nos soiffressiens de motre les devant diz lx pors et il nos donroit ix l de tornois les queles il nos doit randre et baillier nos volons et otroions que ceste chose ne puisse nuire au dit seignor de Naelles ne nos aidier quan au tans qui est a avenir sauf lou droit que nos havons an la devant dite paisson Ou tesmoingnaige de la quel chose nos havons [] nostre seal an ces presentes letres Ce fuit fait an l'an de grace m et dous cenz et iiiixx et dous lou jor de feste Saint Benaoit