Charter Document - 02490078

Nos Colins et Jacoz frere Gevre Colin dit de Gaes ça i en arriers borjois de Flavigney façons savoir a touz ces qui verront et horront ces presantes letres que de mil livres de tornois que Jehanz de Neeles escuiers nos devoit des quex mil livres de tornois que mes sire Jehanz sires de Chasteuil Nuef mes sires Jehanz sires de Frolois mes sire Estienes de Castres chevaliers qui morz est et maitre Andriers de Ravieres qui morz est nos estient ploige et dotour si commil est convenu en unes letres que nos havons sealées dou seaul Piere d'Ostuin bailli d'Auxois et de la Monteingne et dou prior de Nostre Dame de Semur que nos de ces dites mil livres havons heu receu trois cenz livres de tornois por quoi nos prometons en bone foi que nos jamais au dit Jehan seignor de Neeles ne a ses hoirs les dites trois cenz livres de tornois ne demanderons mas l'an essolons et quittons por nos et por nos hoirs Ou tesmoingnaige de ceu nos Colins et Jacoz desux nommé havons mis nos seaus en ces presantes letres Ceu est fait la voille de la Nativité Nostre Seignor an l'an de grace mil et dous cenz et sexante et quinze