Charter Document - 02490077

Nos Hugues d'Arcy bailliz d'Auxois por noble baron Hugon duc de Bergoingne façons a savoir a touz ces qui verront ces presantes letres que cum Guillaumes Gruaus d'Eschannay escuier fust ajornez par devant nous a Vieteaul leu samadi devant la Saint Vincent qui fu an l'an de grace mil et dous cenz et sexante et nuef a la plainte de Jehan de Neelles escuier au quel jour li diz Guillaumes ne vint et li diz Jehanz fu presanz et raisnai par devant nos que il feist tel demande au dit Guillaume se il fust presanz dist et propose par devant nos bailliz de Auxois Jehanz de Neeles escuiers contre Guillaume Gruaul escuier que il leu jor de la septembreche qui passée est de jour mist leu feu en la maison a un homme d'Eschannay por leu quel feu la maisons au dit homme fut arse et cinc des maisons des hommes au dit Jehan et li blef et li fein et autres chouses qui estient dedenz d'ou li diz Jehanz por chief de ceu ha perdues ses tailles et ses autres rantes que li homme li devoient et si homme desheriete si requiert li diz Jehanz au dit Guillaume que les dommaiges qu'il et sui homme hont receuz por chief de ceu qu'il prise bien cent livres de viennois li rande et por vous soit controinz a ceu faire et s'il leu met au ney il s'offre a prover a l'esgart de la cort ceu qui soffire l'enporra et ceu dit il et propose contre leu dit Guillaume sauf le benefice de droit Ceu fu doné leu samadi devant la Saint Vincent en l'an de grace mil et deus cenz et sexante et nuef Nos de rechief feismes rajorner leu dit Guillaume par devant nos a Vieteaul a trois essises ansiganz es eglises et es marchiés es quex trois essises li diz Guillaume ne vint ne envoia leu dit Jehan atandant tant commil duit esraignanz la dite demande et requeranz droit De rechief nos feismes rajorner leu dit Guillaume a nos essises a Vieteal ansiganz por descorper les deffauz que il havoit faiz es quex essises li diz Guillaumes ne vint ne descorpa leu dit Jehan atandant tant commil duit en rainant sa dite demande et requerant son droit nos de rechief feismes rajorner leu dit Guillaume par devant nos a Vieteal leu samadi devant la nativité Nostre Seignor qui fu en l'an de grace mil et dous cenz et sexante et dix por hoir droit sux les diz deffauz et sux la dite demande au quel jour li diz Guillaumes ne vint ne anvoia leu dit Jehan presant par devant nos rainant sa dite demande et requerant droit nos devant diz bailliz qui ne voliens pas randre jugemant de tel cas por ceu que clerz sumes estaublissemes et donesmes plenier pooir et especiaul commandemant de par mon seignor leu duc a Thiebaut leu Borne borjois de Flavigney de randre jugemant de la dite cause et li baillasmes leu pers de la dite cause Ou tesmoing de la quel chouse nos havons mis nostre seaul en ces presantes letres Ceu fu doné an l'an de grace mil et dous cenz et sexante et dix leu dit samadi devant la Nativité nostre Seignor