Charter Document - 02490068

Nos Guiz de Arcy bailliz de noble dame Biatriz ça i en arriers fame deu noble baron Hugon duc de Bergoigne façons savoir a touz ces qui verront ces presantes letres que Giloz diz de Flavigney borjois de Chasteillon ha quité per devant nos de sa bone velonté Jehan leu seignor de Neeles escuier de toutes les chouses qu'il li dut onques jusque a la confection de ces presantes letres et Perroz diz Teste borjois de Chastoillon ha quité per devant nos de sa bone velonté leu dit Jehan seignor de Neeles escuier de tot ceu qu'il li diz Jehanz le mit onques en ploige ne en dote en la main de dit Gilot de Flavigney jusque a la confection de ces presantes letres Ou tesmoingnaige de la quel chouse nos avons ces presantes letres sealées de nostre seaul a la requeste de dit Gilot et deu dit Pierre faites en l'an de grace mil dous cenz sexante et treze ou mois de janvier