Charter Document - 02490064

Nos freres Jaques humbles abbés de Sainte Marie de Chastoillun sur Soigne et je Symonz priors de ces meismes leu façons a savoir a touz cels qui verront et horront cestes presantes letres que en nostre presence estaubli Giloz de Marchisuel borjois de Chastoillun sux Soigne ha requeneu par devant nos que il ha receu de Jehan de Neelles dix et set vint livres et dix livres de digenois an deniers nombrez por chief de cinc cenz livres de digenois dont li diz Giloz ha letres sealées dou seaul lou duc de Bergoigne et de ces diz et set vint livres et dix livres desux dites et nommées li diz Giloz se tient por paiez et ha promis par devant nos li diz Giloz que il ne hons par lui de ci en avant encontre le dit paiemant ne vandra Et por ceu que ceu soit ferme chouse et estauble nos diz abbés et priors havons ces letres sealées de nos seaus a la requeste deu dit Gilot Ceu fu fait en l'an de l'incarnation de nostre seignour mil et dous cenz et sexante ou mois d'octobre