Charter Document - 02490061

Nos frere Jaques humbles abbés de Nostre Dame de Chastoillon sux Soigne et nos frere Thiebauz priours de cest meisme leu façons a savoir a touz ces qui verront et horront ces presentes letres que por ceu estaublie especialmant en nostre presence Ysaubiaus damoisele qui fu fille Guillaume Brideine ha recogneu per devant nos de sa propre velonté non mie controinte que elle par son besoing et par leu besoing son mari et par lour preu ha mis en gaiges par lou los et par l'outroi de Ponçot Rostien son mari en la main Jehan de Neelles escuier demex mui de blé a la mesure de Chastoillun mitié fromant et mitié avoine qu'elle ha en herietaige de son chief ou four de Colomiers lou Soc por vint et cinc livres de la monoie de viannois les quex elle et li diz Pointoz ses maris hont recogneu lour avoir reçeu et heu deu dit Jehan en deniers contanz et s'en sont tenu por paié enterinemant et est li demey muis de blé deu fié au dit Jehan et est a savoir que la dite gaigiere se aquite chascun an de quarante soz de la dite monoie Et deu devant dit demey mus de blé sest devestue la devant dite Ysabiaus por li et por ses hoirs et par leu loux et par l'outroy de devant dit Poinçot Rostien son mari et en hai revesti leu dit Jehan de Neelles par non de gaigiere corporelmant por lui et por ses hoirs et ha promis la dite Ysabiaus avec leudit Poinçot son mari por li et por ses hoirs et par lour sairemanz donez corporalment en noz mains a garantir au dit Jehan et a ses hoirs la dite gaigiere jusque a tant qu'elle se soit reause ensi commil est desux dit por quarante soz d'aquitance chascun an ne qu'il n'iront en contre ne ne consantiront a aler doysor en avant en fait ne en dit Et quant a ceu tenir il hont obligié en la main deu dit Jehan de Neelles et de ses hoirs aus et lor biens mobles et non mobles en quelcunque leu qu'il puissent estre trové et ha renuncié la dite Ysabiaus en ce fait a toute exception d'avoerie et de mariaige et a touz previleges qui sont outroié en favor de famme et elle et ses mariz en hont renuncié et renuncent a tout droit de crestianté et de pohesté et a toutes autres aydes qui lor porroient aydier en ce fait et nuire au dit Jehan ou a ses hoirs Et por ce que ceu soit ferme chouse et estauble nos havons ces presentes letres seallées de nos seaus a la requeste de la dite Ysabiau et deu dit Poinçot son mari Ceu fu fait en l'an de grace mil et dous cenz et sexante et sex ou mois de may