Charter Document - 02490060

Je Regniers doiens de Moleigmes et je Droes curiez de Neelles façons a savoir a ces qui ces presentes letres verront que Guienoz li Fevres fiz Joormez de Chastoillon estaubliz en nostre presence ha recogneu de sa propre velonté sanz coaction qu'il doit et est tenuz a Jehan escuier seignor de Noelles et a ses hoirs se cil Jehanz defailloit a la requeste d'aus vint livres de digenois de bon doite et leaul a paier et a randre a cest Jehan ou a ses hoirs ou a lour comandemant les cinc jorz aprés ceu qu'il en sera requis Et est asavoir que cil Guienoz devant nomméz est tenuz et obligiez des ces vint livres desux nommées a ces devant diz Jehan et a ses hoirs en la maniere devant dite par sa foi donée corporelment en nos mains et renunce à toute exception de droit qui li porroit aidier et celui Jehan nuire Et si sest mis cis Gueniez en nostre jurisdition que je doiens de Moleignes et je curiez de Neales ou nostre successour leu puissons escommenier quel que part que il voit se il voloit contredire en contre ces devant dites covenances Et en tesmoignaige de ceste chouse nos havons mis nos seaus en ces presentes letres a la requeste de cest Gueniet sovant nommé Et ceu fu fait en l'an nostre Seignor mil dous cenz et sexante et i ou mois de decembre